11 saspek i arest-Pentecost

Eleven saspek i stap long hand blong Polis naoia folem rao long Bay Barrier, South Pentecost.

Fo saspek ia hemi olgeta ronwe from oli ol saspek blo wan murder case afta oli pas long kot, mekem oli stap lo bail. Oli sapos blong stap nomo long vila mbe oli kerap oli ronwe kobak long Penticost mo i kat sam memba blong komuniti we oli bin faet bak long taem blong arrest long wiken.

Polis Commander long Not, George Songi hemi konfemem long VBTC nius se polis i bin holem vinis ol 4 saspek we I bin ronwe long custody long Port Vila wetem ol nara wan we i bin long taem blong arrest.

Mr Songi i talem se wetem help blong ol jif mo ol nara lida long komuniti I mekem oli save kam sarenda.

“Thank you tumas long sapot blong olgeta jif mo lida long Pentecost we oli save wok tugeta wetem polis blong mekem se isu ia i solv,” Mr Songi i talemaot.

Long Fraede las wik faev Polis ofisa long Saratamata long Ambae i bin ko long Pentecost blong arestem fo saspek we oli stap long bail kondisen long Port Vila, mbe pipol long Bay Barrier i bin faet bak blong stopem ol ofisa ia mo kivim smol kil long olgeta.

I mekem se Mr Songi i bin sendem 15 ofisa long Luganville mo faev long Port vila oli ko blong help mo kasem ol fo saspek ia.

Mr Songi i talem se i kat some investigation long situation ia we i nid blong oli komplitim yet.

“Olgeta saspek we oli saranda ia oli 11; I mekem se polis i traem blong komplitim ol proses blong hem blong mekem sua se investigation i vinis mo redi long kot,” Mr Songi i talemaot.

Olgeta 11 saspek ia I no sure yet weta Polis bambae i karem olgeta i ko long Vila o oli kam long Santo.