14 dei curfew long full Vanuatu

Vanuatu i extendem nara 14 dei curfew mo i stat tete(Satete).

Minista blong Health, Honoroble Bruno Leingkone, i mekem anaonsmen ia long tete(Satete).

Minista Bruno i talem se Vanuatu i stap long alert level 3 mo wan niu oda i saen blong 14 dei curfew blong ful Vanuatu.

“National curfew ia bae hemi stat long 6pm kasem 6am tete long evri eria long Vanuatu,” Minista Leingkone i talem.

“Oda ia hemi kam long efek long tete Satete March 12 2022 afta long hem ia we i vinis long yestete( Friday). Ol esential seves we i stap long las oda bae oli stap semak nomo mbe i no inkludum olgeta sto mo ol nara esential seves we oli no folem ol COVID-19 protocol.  Muvmen blong olgeta pipol i stil ristrited mo bae Director blong Public Health i save givim permisen long olgeta spesel guest nomo.

“Bae yumi kontinu blong rolemaot vaccine tru aot Vanuatu folem plan blong yumi. Oda ia hemi no inkludum olgeta muvmen blong sea mo air freight cargo insaed long Vanuatu.”

“Spesel gathering long naet klab, sports, jej, skul, ded, wedding mo ol nara semak aktiviti bambae hemi stop long 14 dei curfew ia. Mi wantem askem yumi evriwan blong rispektem olgeta oda ia blong daonem spread blong COVID.”

Minista blong Health i anaonsem 46 niu kes long Shefa long las 24 haoa.

“Hemia i wan gud saen from hemia i wan drop long 14 kes sapos yumi komperem wetem las ripot we yumi ripotem 59 niu kes,” Minista Bruno i talemaot.

“Long Sanma Provins, yumi no rikodem eni niu kes long las 24 haoa. Mo i semak long ol nara provins blong yumi long Vanuatu. Hemia hemi gud tumas long yumi.

“Total kes we yumi kat long kaontri naoia, yumi kat wan total blong 207 aktiv kes evriwan sin January 2022. I kat wan total blong fo kes naoia we oli hospitalised(admit) long Vila Central Hospital. Mo wan nomo hemi stap long critikol kondisen(Sik bigwan).”

Minista Leingkone i talem se Kavman tru long Ministry blong Health i awea se sam skul mo social gathering i stap ko hed long sam ples long Vanuatu.

“Ministry i save se ol oda we i stap kam hemi niu long yumi mbe mi wantem enkarejem pipol blong folem from hemia nao oli niu wei olsem ol niu nomol long laef,” Minista Leingkone i talem.

Minista Leingkone i mekem wan strong kol i ko long evri eria kaonsel secretary, administrata, ol Secretary General blong ol Provins mo ol jif blong pipol i mas rispektem niu 14 dei oda ia.

“Folem hemia mi olsem Minista blong Health, mi wantem mekem wan spesel kol tete i ko long evri jej lida blong yumi raon long Vanuatu, ol pastor, decaon father, yut lida blong organisem ol prea season blong nekis tu manis stat long tumoro March 13 2022,” Minista Leingkone i talem.

“Vanuatu hemi wan christian kaontri mo yumi mas folem biliv blong yumi. Mi wantem talem tankiu long yu we yu stap prea from situasen tete. Yumi nidim wisdom long papa God.

“Evri dei ol technical tim blong ministry blong health, oli stap wok had blong mekem olgeta kondak tracing, mekem olgeta test, mo muvum ol positiv kes i ko long isolation fasiliti.

“Bifo mi vinis mi wantem talem tankiu long ol health wokman, Polis mo ol nara fraenlaen wokman we oli hadwok sins long outbreak kasem tete.

“Olgeta we no tekem stik yet, oli mas ko mo tekem blong no sik bigwan mo lusum laef. God i blessem yumi evriwan mo God i blessem Vanuatu.”

 

 

 

 

(Visited 1176 times, 1 visits today)

About The Author

You might be interested in