14 survivor; Wan ded

Maritime Otoriti hemi diklerem ded long wan smol boy we i lus long solwota long Not Efate long wiken we i pas.

Insiden ia i hapen taem wan smol banana bot i bin stap traem blong karem 15 pasenja i ko bak long Emau aelan.

Manager Response mo Investigations long Vanuatu Maritime Safety Authority, Hickson Sipa i talem se oli bin search long evri ples we hemi sud ko shoa long hem.

Mr Sipa hemi talem se smol boy ia hemi ova 2 yia.

“From current hemi strong, bai save pulum bodi kasem West Coast blong Pele, afta i kam long west blong Nguna ia o Not east. Sapos hemi mestem Nguna bai hemi save kasem chanel bitwin Nguna mo Moso, o oli save faenem hem long ol coastline long ol eria ia olsem Siviri o Andin Bay,” Mr Sipa i talem.

Ofis blong Vanuatu Maritime Safety Authority hemi konfemem se oli bin search long evri ples ia be oli no faenem mo oli kolem of search long Monday, long semtaem talemaot se smol boy hemi ded.

Ol nara 14 pasenja oli bin float ova naet i ko long nara aelan mo ol otoriti oli bin asist blong lukoutem olgeta long Sunday moning, October 9.

Plante oli weak from oli lusum wota long bodi taem oli faenem olgeta.

“Eight oli swim ko sho long Emau, tu long Takara afta helikopta hemi kasem tri long Not East blong Nguna, mo nara wan oli rikavarem hem long Varelapa long Nguna,” Mr Hickson i talem.

Folem ol infomesen Blue taxi Bot hemi travel aot long Takara long evening blong Saturday namba 8th blong ko long Emau be long taem ia i bin kat hevi wind mo strong solwota.

“Mifala i sua se solwota hemi bin strong tumas, wind hemi strong mo taet i strong tu i mekem se i capsaetem bot.

“I kat informesen tu se jif blong Takara hemi bin stopem olgeta blong no travel aot long naet ia be oli no bin listen, mo oli talem se sam pasenga ia oli bin stap anda influens blong alcohol mo fosem capten blong draevem olgeta i ko bak long aelan.”

Mr Siba i konfemem se ful ripot blong investigesen oli no faenalisem yet.

Hemi kol long olgeta we oli kat taxi bot blong oli mas rijiista wetem olgeta blong safeti mo oli mas kat ol laef jacket blong ol pasenja ol taem.

Long insiden we i hapen oli faenem se bot i no rigista long maritime mo hemi nogat laef jacket.

Ship Helper 1 wetem wan helicopter oli bin help long search.

 

 

(Visited 1254 times, 2 visits today)

About The Author

You might be interested in