18 niu COVID kes-Ambae

Eighteen niu COVID kes i rikod long Ambae afta long test long wiken.

Manager blong Penama Public Health, Markson Tabi i talem se long Sunday nomo, oli rikodem six kes mo tete moning, Lolowai Hospital i rikodem nara 11 kes, mobile tim i rikodem wan kes long West we i mekem wan total blong 18 kes.

Hemi talem se i gat kes we oli rikodem long ol eria long Ambae we naoia oli stap mekem contact tracing yet.

Penama Emergency Operation Centre long tete moning i stap traem blong mekem wan lokdaon long eria blong Saratamata kasem long Vureas blong mifala save kivim taem long helt tim blong mekem test folem ol kondak mo tu kivim taem blong save ko raon mo distributem sam COVID material. Hemia blong alaoem evriwan blong save gat akses long infomesen long hao oli save protektem olgeta wetem ol preventiv key mesej we ministry blong helt i stap blong helpem yumi wetem,” Markson Tabi i talem.

Hemi talem se long Pentecost sins long komuniti outbreak, oli bin mekem  2,000 test mo i gat 713 positive kes.

Mbe naoia oli helt woka oli stap rikodem dikris long ol kes ia.

“Ol nurse oli stap ripotem dikris long ol kes we i stap kivim yumi wan pikja blong talem se Pentecost, virus hemi ko daon, fulap man i nomo sik mo oli kam present long ol testing site o health faciliti we i soem moa negative kes bitim fastaem,” Mr Tabi i talem.

Mr Tabi i adem se i moa likeli se bai COVID i kasem evri aelan long provins ia.

Ministry blong Helt i no kamaot yet blong apdeit long situasen blong aelan ia be hemi posibol blong alert level i jens long Ambae.

(Visited 360 times, 1 visits today)

About The Author

You might be interested in