Naentin MP blong vacatem Palemen seat

Spika blong Palemen i askem long Palemen sitting long tedei moning 19 Memba blong Palemen blong vacatem seat blong olgeta long Palemen.

Honoroble Gracia Shadrack, i mekem disisen ia folem absens blong olgeta MP ia long tri consecutiv sitting blong Palemen.

Mr Shadrack i talem se ol MP ia oli bin absen long nambawan kasem namba tri June 2021.

Mr Shadrack i talem se hem i mekem disisen ia from ol Memba blong Palemen ia i no folem Palemen Standing Oda, Oli no rispektem otoriti blong Spika blong Palemen, oli absen long tri consecutive sitting blong Palamen mekem se bisnis blong haos i nosave ko hed, oli absen witaot pemisen blong Spika blong Palemen, Oli infringem raet blong ol constitutional vota we oli elektem olgeta olsem ol Memba blong Palemen anda long atikol 4 (1) long mama loa mo contem blong Palemen long vacancy seat act 174 cap 2 (d).

Mr Shadrack i mekem ruling ia beis long atikol 22 (2) long mama loa we i talem se spika i kat raet blong preside long ol Palemen sitting mo meintenem oda.

Ol Memba ia i kat Praem Minista mo wan Memba blong Palemen blong Tanna, Bob Loughman, Deputi Praem Minista mo wan Memba blong Palemen blong Port Vila constituency, Alatoi Ishmael Kalsakau, Samson Samsen, wan Memba blong Palemen blong Santo Rural, Edward Nalyal Molou, Memba blong Palemen blong Tafea Outer Islands, Nako Ianatom Natuman, wan Memba blong Palemen blong Tanna, Leonard Joshua Pikioune, wan Memba blong Palemen blong Santo, Mark Melsul, wan Memba blong Palemen blong Pentecost, Edmond Julun, wan Memba blong Palamen blong Malekula, Xavier Emanuel Harry, wan Memba blong Palemen blong Tanna, Harry Anthony, wan Memba blong Palemen blong Port Vila, Jay Ngwele, wan Memba blong Palemen blong Ambae, Simeon Seule, Memba blong Palemen blong Epi, James Bule, wan Memba blong Palemen blong Ambae, Willie Pakoa Setearoto, Memba blong Palemen blong Sherpherds Outer aelan, Mark Athy, Memba blong Palemen blong Luganville, Willie Daniel, Memba blong Palemen blong Tongoa, Silas Bule, wan Memba blong Palemen blong Pentecost, Bruno Tau Leingkone, wan Memba blong Palemen blong Ambrym, Johnny Koanapo Raso, wan Memba blong Tanna.

Prime Minista, Honoroble Bob Loughman, i talem se evri Memba oli bin atendem Palemen long ol taem ia.

Hemi konfemem wetem VBTC Nius se bae kavman i jalenjem ruling ia long court.

Prime Minista Loughman i talem se oli fil se Spika blong Palemen i nosave vacatem seat blong ol Memba blong Palemen unless i gat wan court jajmen.

“Long minit blong Palemen i gat 28 Memba blong Palemen i no atendem tri sitting mbe i gat 19 nomo i afek long ruling blong Spika blong Palemen,” Prime Minista Loughman i talem.

“Hem ia i wan risen we mifala i no wantem tokbaot mo court nomo bae i kivim legal tinktink long hemia.

“Mifala olsem kavman bambae i tekem i ko long court blong hemi mekem ruling blong hem, mo yumi wet kasem taem court i lukluk mo mekem ruling blong hem.”

Prime Minista Loughman i biliv strong se bae court ruling i tekem olgeta i kobak long Palemen.

Mr Shadrack i adjournem Palemen sitting long tete i ko long Friday long 8:30am.