Twenti-tu MP oli saspen long tu dei sitting

Vanuatu Palamen hem i saspendem 22 long olgeta memba blong hem blong no attendem tu dei sitting, Wednesday 17 June mo Thusrday 18 June.

Suspension ia hem i bin hapen long Mandei evening long wan motion we oli bin dibeitem blong saspendem olgeta 22 MP blong no attendem fo dei sitting, from oli bin boycottem Palamen long las wik.

Olgeta Honorable MP ia, Charlot Salwai Tabimasmas, Marcellino Telukluk, Rick Mahe Tchamako, Ulrich Sumptoh, Francois Batick, Jotham Napat, Matai Seremiah Nawalu, Job Sam Andy, Bakoa Kaltonga, Ian Wilson, Ralph Regenvanu, John Sala, Alfred Maoh, Andrew Napuat, Gillion William, John Salong, Danny Silas, Boe Reve Ephraim, Julun Edmund, Gaetan Pikinoune, Stevens Fabiona Nano mo Lulu Sakaes bae oli nosave attendem sitting long Wednesdei mo Tosdei, bae oli kam bak blong attendem sitting long Fraedei.

Everi wan hem i ol Oposisen MP.

Motion ia hem i blong saspendem olgeta memba ia blong no attendem fo dei sitting long Palamen mbe long debate blong motion yestedei, muva blong motion, Deputi Praem Minista, Alatoi Ishmael Kalsakau hem i muv blong oli jenisim sam pat blong motion ia.

Deputi Praem Minista Kalsakau hem i bin muv se bae oli ridiusum namba blong ol dei blong siting ia long fo i ko long tu dei siting we olgeta saspended memba ia bae oli no attendem.

“Mr Spika, mi stap askem amendement blong motion blong suspension blong fo dei. Mo mi stap askem amendement blong suspension we bae i stap long tu dei. Mo ol colleague blong yumi bae oli joinem bak yumi long Fraedei. Tankiu Mr Spika,” Mr Kalsakau i talem long dibeit yestedei.

Mr Kalsakau i widroem nambatu pat blong motion ia we olgeta Kavman MP i askem blong ol suspended memba ia i mas ripeim kos blong dileim Palamen long las wik bifo oli save attendem bak ol sitting.

Hem ia hem i namba wan motion blong 2020 we oli bin jenisim mo hem i bin pas wetem 29 votes long favor mo 22 votes akens.

I gat ol narafala motion we oli stap yet blong Palamen i dibeitem. Mo Spika hem bin ajenem i ko long Tosdei 18 June.

Olgeta motion ia i gat, motion blong apruvum wan cut long salari blong ol lida long Kavman mo Oposisen we MP Ralph Regenvanu hem i muvum mo MP Charlot Salwai hem i sekendem.

Narafala motion hem i blong Constitution blong wan Parliamentary Standing Committee long Public Accounts we MP Samsen Samson blong Santo Rural nao hem i muvum mo sekenda blong motion ia hem i Tafea Outer Island MP Edward Nalyal.

Narafala motion hem i blong Constitution blong Parliamentary Standing Committee long Economics mo ol Foreign Polisi we MP Samsen hem i muvum mo MP Nalyal hem i sekendem.

Mo narafala motion hem i blong Constitution blong Parliamentary Standing Committee long Social Affairs. Hem ia tu MP Samsen hem i muvum mo MP Nalyal hem i sekenda long hem.

Palamen i gat 14 Kavman bil we oli lisitim blong debeitem long fes ordinary sitting blong 2020.

Vanuatu Palamen Clerk, Raymond Manuake hem i bin talem long VBTC se suspension blong olgeta MP ia bae hem i afektem siting alawaens blong olgeta. Mbe bae i nosave afektem sitting blong Palamen, bae sitting i ko hed nomo from majority blong ol MP oli stap long kavman saed mo olgeta nao bae oli stap long sitting long ol dei ia.

(Visited 624 times, 1 visits today)

You might be interested in