Twenty five cooperativ blong kat internet akses

Twenty five cooperativ long Vanuatu bae i kat akses long internet long eli 2022.

Dipatmen blong Cooperative i saenem wan akrimen wetem Vodafone Vanuatu Limited long eli manis ia blong provaedem seves ia.

Media Ofisa blong Ministry blong Trade mo Ni-Vanuatu Bisnis, Jean Baptiste Calo, i ripotem se Director blong Cooperative Dipatmen, Ridley Joseph mo Chief Executive Ofisa blong Vodafone Vanuatu Limited, Barlen Lutchmoodoo, i saenem kontrak projek ia we hemi VT9.8 million.

Mr Calo i talem se divelopmen ia hemi wan maelston blong ol cooperativ long Vanuatu.

Director blong Cooperativ Dipatmen, Mr Joseph, i talem se tinktink ia oli bin stap wok long hem blong fo kasem faev manis pas mo oli jes putum pen long pepa long August ia blong sapotem ol cooperativ ia long stret financial system mo trade long platform ia.

Mr Joseph i talem se plan hemi stap blong instolem ol set blong satelite disk long 50 cooperativ we oli selektem vinis.

Hemi talem se bae oli wok long fes 25 cooperativ fastaem.

Mr Lutchmoodoo i talem se konektiviti hemi key blong evri cooperativ long ol aelan mo hemi glad tumas blong help.

Hemi talem se projek ia hemi helpem ol cooperativ blong konek tuketa long level blong komunikesen blong i mo isi long futja.

Projek blong putum ol dish blong satetilite long 25 top cooperativ bae i stat long eli nekis yia, 2022.

I kat araon 400 regista cooperativ long Vanuatu.

 

(Visited 119 times, 1 visits today)

About The Author

You might be interested in