27 niu COVID-19 kes long boda

Vanuatu i konfemem 27 niu COVID-19 boda kes long kwarentin mo i mekem totol i kasem 31.

Minista blong Health, Honoroble Silas Bule, i mekem anaonsemen ia long tete evening.

“Long wik ia, Ministri i konfemem nara 27 aktiv kes insaed long kwarentin long las 48 haoa,”Minista Bule i talem.

“19 COVID kes ia oli kam long flaet blong New Zealand, Wan hemi blong Noumea flaet mo seven long ol kes ia hemi ol franlaen wokman. I mekem se tete yumi kat wan totol blong 31 aktiv kes long Vanuatu. Mbe eight oli rikava mo oli stap wet blong faev moa dei bifo oli save joinem bak komuniti.

Minista Bule i talem se ol tes sampol i kambak ovasi mo soem se type blong virus ia hemi Omicron. Hemi advaes se i nogat eni komuniti transmisen mbe pipol we oli no tekem COVID-19 stik yet i mas ko tekem.

“Ministri blong Health i wantem infomem pablik se bambae hemi inkrisim screening blong ol flu like illness long Vila Central Hospital,” Minista Bule i talem.

Minista Bule i askem tu pablik blong ko tekem boosta dos(Nambati stik) blong COVID-19 afta long faev manis stik blong seken dos.

Ministry blong Health i askem pipol blong no lisen long ol kiaman nius mbe folem nomo fesbuk pej blong Health Promotion mo website blong Ministry.

Efate mo ol offshoa aelan blong hem i stil stap long level 1.

“Washem han wetem soap mo wota, no tajem eye, nose mo maot, oltaem klinim ol seves blong tabol mo jea mo taem kof pratisim gudfala hygience.”

VBTC Nius i kasem toksave se COVID-19 Taskfos i saspendem ol repatriation flaet bageken.

Hemia blong givim taem blong ol Helt Time i monitor progres blong ol kes we i stap long kwarentin naoia.

Tasfos i talem se afta long wan manis bae oli reviewem bageken plan blong repatriation.

Vila Central Hospital i talem tu se hemi limitim ol seves blong hem stat tete(Friday February 4) mo bai i lukluk nomo long ol emergensi.

Long wan memorandum we Acting Medical Superintendent, Dr Jimmy Obed i putum out i statem se stat long namba 4 March bai emergency dipatmen bai i risivim nomo ol emergencies.

Dr Obed i talem se muv ia hemi blong alaoem hospital i putum gud ol internal proses blong olgeta blong dil wetem eni COVID-19  kes sapos hemi gat wan outbrek long komuniti.

Securiti bai i strict long ol visitors we oli kam long hospital, mo bai hospital i allowem nomo ol relative blong stap insaed long ward.

Mo tu bai hospital ia i saspendem fastaem ol Seasonal Wokman medikol jek we oli stap mekem.

Memo ia, i talem se evriwan we i ko long Vila Central Hospital bai kontinu long ol COVID-19 sef praktis olsem wearem mask, social distancing mo hand hygiene.

 

(Visited 1579 times, 1 visits today)

About The Author

You might be interested in