3.5 per cen populesen i no pat long census

Preliminary o eli risal blong 2020 National census i soem se 3.5 per cen blong populesen blong kaontri oli no bin kaontem olgeta.

Director blong Statistics, Andy Kalo, i talem se 3.5 per cen blong populasen ia nao oli adem blong mekem se current populesen i kasem 301,695 pipol.

Director Carlo i talem se stret namba blong ol pipol we oli bin kaontem hemi 292,000 mo olgeta ia oli rikod i stap long system.

Hemi bin kivim tri jalenj we i mekem se i kat anda-count long National census ia, wan hemi from i kat sam pipol we oli no wantem blong oli kaontem olgeta, narawan hemi logistic blong save kasem ol rimot eria i mekem i had mo last wan hemi isu blong COVID-19 we i bin kosem lokdown long Efate.

“Mbe anda count namba count ia yumi bin aplyem ol statistical prosija mo terminology long hem mo yumi addem finis long populasen we yumi rikodem i stap,” Mr Carlo i talem.

Mr Carlo i talem se hemia hemi no fes taem we oli i kat andakaont, long evri census i kat, mbe long census ia oli wantem jensem aproach mo talem tankiu long ol pipol we oli no bin kaontem.

3.5 per cen ia hemi ripresentem ova 9,000 pipol we oli no bin kaontem.

Honourable Minister blong Finance mo Economic Management, Johnny Koanapo nao i mekem ofisiol diklarasen blong ol eli risal blong 2020 National Census long eli wik ia.

Pipol i save aksesem ol risal ia long website blong national statistics.

Director Andy i talem se ol fika we oli rilisim long wik ia bai oli further analysem mo rileasim final count long manis blong Octoba.

“Tete preliminary ia hemi jes national, urban, rural mo provins mbe long October bai Minista hemi putum aot ful ditel ripot, hemia volume wan blong national census.

“Naoia yumi kivim aot blong pipol oli awea long hamas man oli stap long kaontri, hemia nao hemi rili impoten from yumi lukim tumas namba i stap flae raon.”

Mr Andy i talem se i save kat jens long namba we i kamout long eli risal ia mbe bae hemi no bigwan tumas.