Ni-Vanuatu Agro Industry Council blong sapotem prodak blong Vanuatu

Department blong Industry i stap wok blong promotem lokol prodak blong man Vanuatu long lokol mo ova sea maket.

Principal Manufacturing ofisa, Lazarus Aising, i talem se wan bodi bae i set ap blong  mekem se ol bisnis i adem valiu long prodak blong olgeta mo save salem aot.

Hemi talem se,  Ni-Vanuatu Agro Industry Council, hemi luk save hadwok blong ol Ni-Vanuatu, mo bae i help blong leftemap bisnis, we oli kriatem blong oli save kompit long maket mo kontribut long ekonomi blong Vanuatu.

“Fulap lokol bisnisman oli statem smolsmol bisnis blong olketa mbe i had blong oli kam antap from oli nokat  plante samting mo Council ia i setap blong helpem olketa,” Mr Aising i talem.

“Council ia, i blong lukluk plante long ol agro proces prodak blong Vanuatu blong adem valiu mo tinktink we i kamaot i blong helpem ol manples blong improvum qualiti standard.

“Aotbrek blong COVID- 19 i kivhan long Kavman blong hemi disaenem wan wei blong ol man Ni-Vanuatu i wok folem blong mitim nasonal standed festaem bifo hemi lukluk long intanasonal level.”

Alain Jacobe, Interim Chairman blong Council ia, i tokbaot komitmen blong kavman long prodaktiv sekta mo talem se wan long olketa samting we kavman i tinktink long hem, hemi putum bigfala mani long sekta blong Agriculture.

“Yumi harem se kavman i kivim VT 3 billion i ko long Agriculture Bank mo VT 1 million i ko long sekta blong Agriculture,  mo everi mani ia i blong prodaksen,” Mr Jacobe i talem.

“Mbe kavman i luksave se prodaksen i gud mbe bae yumi marketem olsem wanem mo hemia ia nao bae yumi wok blong value adem ol prodak long lokol market fastaem.

“Agro Industry Council ia, hemi longtaem wish blong manples blong oli save kam antap long bisnis mo plei long semak ples wetem ol investa.”

Mr Jacobe i talem se plante lokol bisnisman blong Vanuatu, i no bin kat eni infomesen long ol prodak blong olketa.

Hemi talem se hemia i wan wiknes we yumi kat long Vanuatu tete, from yumi produsum sam qualiti prodak, mbe yumi nokat eni infomesen blong save salem ol prodak ia long lokol mo expot maket.

“Hemi wan jalenj we mi bin fesem mi wan, taem mi bin stap mekem noni jus,” Mr Jacobe.

“Blong expotem wan prodak olsem we hemi wan beverage, yu mas mekem sua se i folem ol Food Standard Regulations mo ol standard ia nao mifala i wantem se council we i set ap, bae i helpem everi Ni-Vanuatu we oli stap mekem bisnis blong save hao nao oli ko tru long bisnis blong olketa,” Mr Jacobe i talem.

“Mo tu hao oli save expot i ko long olketa maket mo stap long semak level long hao wan prodak i kam ova sea.”

Department blong Industry i talem se hemi stap wok long apointmen blong bodi ia mo bambae i gat wan awareness i tekem ples.

Ni-Vanuatu Agro Industry Council bae i wok fulwan stat long 2021.

 

 

 

 

 

 

 

(Visited 36 times, 1 visits today)

About The Author

You might be interested in