50 saspek blong fraud

Immigration Dipatmen i faenemaot 50 saspek blong fraud long kaontri.

Long wan Polis mo Immigration operation long wik ia long Port Vila mo Luganville, ol ofisa i faenem olgeta saspek ia se oli stap mekem ol kiaman dokumen olsem visa, paspot, ID card mo work Permit card mo salem long ol forena blong mekem mani.

Minista blong Internal Affairs, Honoroble Ismael Kalsakau, i talem se, “Amaon blong funds we ol criminal ia i kolektem long counterfeiting migration document oli tekem ova long VT50 million long las faev yia.”

Hem i talem se afta long investikesen sapos i tru se sam Chinese nasonal ia oli rili involve long ol kaen activiti ia, bae oli dipotem olgeta aot long kaontri.

Hemi talem se ol nara lokol pipol bae oli ko long jail.

Director blong Immigration, Jeffery Markson, i talem se olgeta 50 saspek pipol ia, sam hemi ol forena mo sam hemi ol lokol pipol.

Hem i talem se olgeta everiwan ia, ol ofisa i bin kasem olgeta long haos blong olgeta long Tuesday wik ia.

Long las tu yia, immigration ofis i bin stap investiket mo faenem sam long ol pipol ia i stap kivim aot ol kiaman residensi permit card we i ko tuketa wetem kiaman citizenship leta, kiaman passport, kiaman immigration stamp wetem kiaman immigration leta blong certification.

Minista Kalsakau i talem se sam oli fasilitatem proses blong mekem fraud.

“Sam pipol ia oli involve long migration documen fraud aktiviti,” Mr Kalsakau i talem.

“Ol aktiviti olsem document manufacturing, duplications, counterfeiting mo forgery long ol official documen.

“Mo hem ia i semak long VT20 million revenue loss blong Kavman long las faev yia.”

Mr Kalsaku i talem se risal blong ol kiaman document ia i no risal long loss blong revenue nomo mbe i alaoem ol forena wetem criminal, transnational crime money laundering mo ol nara criminal rikod i entarem Vanuatu.

VBTC i witnisim long Tuesday wik ia, ol polis ofisa i bin raidem wan haos blong wan Chinese nasonal we i stap tu olsem wan main saspek long kes ia.

Ol ofisa ia i bin karemaot ol kiaman document ia.

INDIA Delta Operation we i involvem ova long 100 polis mo immigration ofisa i tekem ples folem wan ofisol komplen we Vanuatu Immigration i lojem long Vanuatu polis fos long namba 10 June.

Mo bae polis i kontinu blong helpem immigration ofis blong investigatem mo prosecutem ol pipol we oli involv long migration documentation fraud activit ia.