72 haoa lokdaon Efate -COVID komuniti outbrek

Efate i ko long 72 haoa lokdaon folem fes COVID-19 komuniti outbrek long Port Vila.

Minista blong Health, Honoroble Silas Bule i mekem anaonsmen ia long tete aftanun.

Minista Bule i talem se investiketion mo kondak tracing i stap ko hed naoia.

“Anaonsmen tu i stat naoia se i kat wan lokdaon blong 72 haoa long Efate mo offshoa aelan blong hem, ” Minista Bule i talem.

“Tete tu yumi stopem domestik flaet mo ship blong no travel aot long Efate mo offshoa aelan blong hem. Mo yumi stopem International flaet we i kam insaed long kaontri mbe alaoem nomo ol pasenja blong travel aot.  Wetem fes komuniti outbrek, Efate mo ol Offshoa aelan blong hem i ko long alert level 2 we i minim se risk hemi hae mo i hemi soem se i COVID-19 kes long komuniti. Ol nara aelan long Vanuatu i stap long alert level zero.

Minista Bule i talem se long 72 haoa ia Ministry blong Health i fokas long wok ia.

“I kat wan emergency plan blong feswan i fokas long inkrisim severllience mo kondak tracing,” Minista Bule i talem.

“Risk komunikesen mo komuniti engagemen mo hospital i open long evri seves. ”

Minista Bule i talem se i kat ol strong mesa blong folem naoia i ko.

“Evri Non- Essential Services hemi klos, ol skul long Efate mo ol offshoa aelan hemi klos, ol non-essential kavman seves oli klos, i nokat ol pablik gathering olsem ol jej seves, mared, ded o nakamal. Physikol distens o stap 1.5 mita long narafala man. Man i save wokbaot nomo i stat long 6am kasem 6pm. Mbe ol essential service nomo mo olgeta we oli nidim ol health emergency i save muv raon long haoa ia.

“Stat naoia i ko werem mask oltaem sapos ko aot long haos o stap long ol ples we i kat tumas man. Ol pablik transpot bambae oli operate folem strik COVID-19 mesa.

“Ol inbound mo outbound medivac oli save ko hed. Ol essential seves we hemi stap ko hed, hemi inkludum, ol telecomunikesen seves, ol supermarket mo ol sto we oli salem kakae, hospital mo ol narafala health emergency seves, ol bank mo ol nara financial institution mo nara moa blong Ministry blong Health i apdeit long hem.”

Minista Bule i talem se long 72 haoa ia kasem long Satete ia kasem Monday nekis wik, hemi impoten blong pas long hospital sapos pipol i fil sik.

“Hemi impoten sapos yu experience eni saen blong COVID-19, olsem feva, kof, musle i taet, o yu nosave pulum gud wind, plis ko kwik taem long Vila Central Hospital blong oli testem yu,” Minista Bule i talemaot.

“Eni nara sik hemi oraet long yu tu, hemi impoten blong kam hospital mo bambae i kat wan threat system i stap inples we i save karem seves we pipol i nidim. Yumi enkarejem pipol blong werem mask taem oli ko long Vila Central Hospital. ”

Minista Bule i talem se ol aksen blong mekem long alert level 2, washem han long sop mo wota, no tajem eye, nose mo maot mo pratisim gudfala hygience olsem kaverap kof mo sneeze wetem elbow.

“Klinim ol seves blong tabol mo jea mo stap kwaet long haos sapos yu sik,”Minista Bule i talem.

“Olgeta we no tekem stik yet i mas ko tekem long Monday blong no sik bigwan mo lusum laef. Yumi mas tekem stret infomesen long ol ofisiol sos we hemi ministry blong health. Plis no spredem ol infomesen we yu save se hemi no tru. Ko long website blong Ministry blong health o fesbuk pej blong health promotions.

Ministry blong Health i askem sapot blong ol Jif, Woman mo Yangfala blong yusum ol netwok blong olgeta mo helpem ministry blong health blong mekem toksave long COVID-19 blong save help katem daon spread long komuniti.

 

(Visited 1319 times, 2 visits today)

About The Author

You might be interested in