Acid ren i destroyem ol karen long Whitesands

Tafea Disaster Ofisa i talem se ashfall blong Yasur volcano long Tanna i fom long acid ren, mo damejem plante kakae blong ol pipol long eria blong Whitesands.

Johnny Taio, long National Disaster Management Office, i talem se level blong Yasur volcano i stap long level tu yet, mbe long wik blong July ia, ashfall i kam long fom blong acid ren mo i cosem ol kakae long karen olsem corn, manioc mo banana i ded.

“Ol pipol we oli kat famili long Whitesands, sapos yu kat wan smol kakae o mani, plis sapotem ol famili we oli stap fecem disasta long nara saet blong aelan,” Mr Taio i talem.

“Mi stap priperem wan ripot we mi kasem long komuniti blong Lownou mo Lounasunen, we oli afek bigwan long ashfall mo bae mi sendem i ko long National Disaster Management Office long Port Vila.

“Mo ating bae wan rapid asessmen tim i kam mekem asessmen long ol eria ia blong seken push blong ol kakae.”

Mr Taio i talem se i kat seken push blong kakae blong helpem ol famili we oli afek long ashfall blong volcano, mbe from laved blong 40 yia Independence i mekem se i stop smol taem, mbe bae i kat wan respons yet.

Hemi talem se naioa ol pipol long eria blong Whitesand i stap pem kakae nomo long Lenakel market.

“Bifo plante pipol long eria ia i mekem mani long ol turis we oli stap kam blong visitim Yasur Volcano, mbe naoia wetem COVID-19 pandemic, plante oli faenem i had blong mekem mani,” Mr Taio i talem.

“Mo naioa oli rili nidim kakae.”

Secretary General blong Tafea Province, Joe Iautim, i talem se ofis blong hem i no kasem eni ripot se ol pipol blong Tanna we oli afek long ashfall blong volcano i stap angre.

Hemi talem se provins i nosave act sapos hemi no kasem eni official infomesen.

“ Once mifala i tekem ripot bae mifala i kontactem asessmen wetem Dipatmen blong Agriculture mo National Disaster Management Office blong faenem aot se hemi tru o no,” Mr Iautim i talem.

“Pipol i mas understanem se eria blong Whitesands i kat tu zone.

“Zone wan, hemi eria we i afek everi yia long ashfall blong volcano mo zone tu i stap long west pat.”

Mr Iautim i talem tu se social media i save mekem wan smol samting i ko bigwan mo hemi gud blong usum long raet wei.

Hemi talem se Tafea Province bae i helpem ol pipol sapos hemi kasem ripot.

Mr Taio i apil long ol komuniti blong Whitesands eria long Tanna, blong mas boilem wota bifo oli drink blong stap sef.