Agrikalja blong risivim wan billion vatu taem bisnis i filim impak blong COVID-19.

Council blong ol Minister hem i bin apruvum yus blong VT1 billion long Kavman stimulus pakej blong developem agrikalja prodaksen long Vanuatu.

Economic Stabilisation Package team leader, Rex Willie, hem i konfemem.

Hem i talem se mani ia bae oli karem long wan Employment Stabilisation Package we i stap vinis, we hem i bin stap provaedem sam inkam riplesmen peimen from impak blong COVID-19 mo Cyclone Harold.

“Sapos yumi gat problem wetem ol impot blong ol goods or ol man i lusum wok, yumi [save rilae] long agrikaljarol prodaksen olsem wan extra sapot,” Mr Willie i talem.

Long resen opening blong Agrikalja Sho long Port Vila, Prime Minister hem i anaonsem 21 pesen blong adisinal badjet blong nekis yia we bae oli putum i ko long Ministry blong Agriculture.

Taem Vanuatu Kavman hem i ridaerektem fokas blong hem, ol narafala bisnis long Vanuatu mo raon long rijen oli kontinu blong safa.

Wan resen Pacific Business Monitor (PBM) sevei hem i faenem se kie jalens we i stap fesem ol bisnis long Pacific hem anseteniti.

Naenti-tri pesen blong ol bisnis long Pacific we sevei ia i kasem olgeta, oli ripotem se mein jalens hem i oli no save hao long bae COVID-19 crisis ia i stap.

Ol finding ia oli bin pablisim long namba fo Pacific Trade Invest (PTI) Pacific Business Monitor mo ripot long wan sevei we oli bin karemaot bitwin 29 June mo 12 July. PBM hem i kondaktem ol rekula sevei blong trakem wanem ol bisnis oli stap ko tru long hem araon long Pacific wetem aim blong helpem ol kavman mo ol polisi meka blong respon moa ifektif long ol impak blong COVID-19.

“Anseteniti blong hao long COVID-19 bae hem i stap … hem i stap oltaem olsem top jalens we ol bisnis oli fesem sins fes sevei blong mifala long manis Maj 2020,” Caleb Jarvis, Trade mo Investment Commissioner, blong PTI Australia i talem.

Evento Pacific hem i stap yet olsem COVID-19 fri hem i stap filim impak blong global pandemic ia.

“Long Australia, ples we mifala i tink se mifala i kontrolem gud pandemic ia, Melbourne hem i bin ko bak long lok daon mo Sydney hem i stap dil blong manejem ol smol smol aotbrek,” Commissioner Jarvis i talem.

“Hem i putum bak kwesten se wetaem bae intanasonal travel bae hem i kam bak sef mo hem i mekem i difikol tumas blong ol bisnis long Pacific blong plan fowod, espeseli ol indastri olsem turism we oli rilae long ol boda blong open.”

Commissioner Jarvis hem i talem se anseteniti hem i stap long ol pridiksen abaot wetaem bae ol bisnis i save ko bak nomol.

“Wan-qota blong ol bisnis oli no sua wetaem ol kondisen bae oli kam bak nomol mo 20 pesen oli no expektem blong revenui blong olgeta bae i kam bak olsem bifo COVID-19 mo bae i stap olsem kasem 2022 o leita,” hem i talem.

Sevei ia hem i soem se plante binis oli nidim finansol sapot. Ol bisnis oli talem se oli nidim finansol sapot, we bae i ko antap kasem 49 pesen long tu wik o elia.

Dispite ol difikolti ia, Commissioner Jarvis i talem se i gat ol saen se ol bisnis oli stap traem blong adjustem olgeta blong operet long taem naoia.

“Even wetem 88 pesen blong ol bisnis i ripotem wan diklaen long revenui blong olgeta, hem i enkarejing blong luk se ol namba blong ol bisnis we oli bin ripotem se oli stap ridusum woking haoa mo ridusum namba blong ol staff blong olgeta, naoia i gat smol namba blong ol bisnis ia, oli stat blong faenem stabiliti mo wan niu wei blong operet,” hem i talem.

Negativiti blong crisis ia long mental helt blong ol bisnis ona i stat blong kamaot sloslo.

Namba blong ol bisnis ona we oli ripotem ‘veri negative’ impak long mental helt blong olgeta hem i bin drop i ko long haf sins long las sevei mo plante oli stap talem se oli hapi.

“Privet sekta bae hem i kie blong bildim bak Pacific ekonomi,” Mr Jarvis i talem.

PTI bae hem i kontinu blong monitarem impak blong COVID-19 long ol bisnis mo blong infomem ol kavman, dona mo stekholda long rialiti blong wanem Pacific privet sekta hem i stap fesem.

(Visited 23 times, 1 visits today)

About The Author

You might be interested in