Air Vanuatu blong kriatem moa projek

Kavman i wantem Air Vanuatu i kriatem moa projek blong airline blong save mekem mani.

Minista blong Finance mo Economic Management, Honoroble Johnny Koanapo, i talem toktok ia long VBTC Nius long wik ia.

Minista Koanapo i admitim se Air Vanuatu hemi wan State own Enterprise kampani blong kavman mbe hemi neva pem bak dividen i ko bak long hem.

Hemi talem se hemi wan longtaem feil.

Minista Koanapo i talem se tete kavman i wantem luk sam niu projek.

“Yumi sapotem kampani from hemi flaeyem flag blong yumi, meinteinem linkage mo long sense long risponsibiliti blong hem i bigwan mbe long saed long hao hemi mekem mani, hemi mas helpem kavman tu blong lukluk long sam narafala eria blong tekem mani i kam insaed blong helpem sabsidy we kavman i stap givim long olgeta,”Minista Koanapo i talem.

VBTC Nius i kasem toksave se kavman i stap givim mani blong sapotem bisnis plan blong airline.

Jeaman blong Air Vanuatu bod, Sam Firi, i talem se bae oli wok long nekis projek blong wan niu hangar- wan bilding blong holem taet ol aircraft insaed mo blong yus long meintenens.

Mr Firi i talem se nara projek i blong operetem bak Azure Pure Wota we oli pem vinis.

Hemi talem se niufala hed ofis blong Air Vanuatu i help blong katem daon bigfala cost blong vatu.

“Yumi wantem se bambae yumi mas katem kost blong yumi, sapos yu rememba long las yia long naen manis, ATR plen i no stap long fleet, hemi bin stap long cairns long Australia, so long ol plesia nao yumi luk ol kosting ia mo yumi putum wan projek we i stap naoia blong next wan, hemi graon breaking blong niu hangar,”Mr Firi i talem.

“Mo mifala i bin pasem resolution blong hem vinis long bod wetem endorsemen blong ol shareholda. Hanga projek blong meintenens fasiliti ia i save holem taet 737 plen, ATR mo ol twin otta plen blong taem i nogud, yumi save fixim nomo long Port Vila.”

Minista Koanapo i talem se hemi stanbae blong sapotem eni niu projek we bambae i help blong mekem vatu long longterm blong Nasonal airlaen.

“Mi olsem minista blong Finance mo Economic Management, mi bin mekem i klia blong putum wan mani blong sapotem hangar projek ia,”Minista Koanapo i talem.

“Mbe i gud we bod blong air vanuatu i tekem projek ia i serious from yumi nidim seves ia long plesia from i kat ol kwalifae enginia.”

Nasonal airline, Air Vanuatu i stap wok naoia blong strengthenem mo impruvum jata flaet blong ol seasonal wokman mo hemi plan blong lifemap namba blong flaet i ko long ol smol aelan stet long rijen.

Kavman i nomo pem sabsidy blong nasonal airline sins 2015.

(Visited 797 times, 1 visits today)

About The Author

You might be interested in