Air Vanuatu i wantem luk rikwamen blong Samoa

Air Vanuatu i talem se bae hemi wet blong luk writen rikwamen blong ol flaet atenden i mas kat wan COVID tes bifo flaet blong ol Ni-Vanuatu studen blong Samoa i aot long kaontri.

Hemia folem wan insiden long wik ia we flaet blong ko long Samoa long long Tuesday moning i bin kambak long evening long Vanuatu from ol flaet atenden blong Air Vanuatu i no tekem ol tes blong COVID.

Chief Executiv Ofisa blong Air Vanuatu, Atu Finau, i kleim se insiden we i hapen long flaet blong Samoa long wik ia, i wan mis-komunikesen blong Foreign Affairs Ofis blong Samoa wetem airline blong olgeta.

Long December las yia, Air Vanuatu i bin mekem wan flaet i ko long Samoa mo long taem ia ol flaet atenden i no tekem eni tes blong COVID.

Mr Finau talem se oli no save long rul blong Samoa se ol flaet atenden blong national airline i mas kat wan COVID tes.

“Mifala i bin sek mo sapraes blong harem nius ia mbe bifo flaet ia i aot, mi wantem luk niufala rikwamen ia fastaem,” Mr Finau i talem.

“Sapos i bin kat wan, kwesten se from wanem nao olgeta blong Samoa i no bin letem mifala i save long hem.

“Oli sud talem long mifala fastaem bifo oli apruvum flaet blong Air Vanuatu ia.

“Mbe flaet ia, ol othoriti blong Samoa yet i apruvum blong yumi save flae i ko long Samoa.”

Jeaman blong Scholarship Board long Ministry blong Education mo Training, Colin Natonga, i talem se long steij naoia oli nosave wetaem bae flaet ia i ko long Samoa.

Hemi talem se bae oli wet nomo long olgeta toktok we ol othoriti blong Samoa mo Vanuatu i stap kat naoia.

Plante pipol i bin talem nogud Air Vanuatu long social media se why oli mekem aksen olsem blong flaet ia i kambak wetem ol studen ia.

Mr Finau i talem se Air Vanuatu i stap mekem ol flaet i ko long New Zealand, Australia, Fiji, New Caledonia, Solomon Islands mo Samoa long las yia mo i nokat eni rul olsem.

Hemi no rong blong national airline blong mekem ol studen oli no kamaot long plen taem oli kasem Samoa.

“Negotiation i stap gohed naoia bitwin Ministry blong Education mo Training, Foreign Affairs Dipatmen blong Vanuatu mo Samoa wetem Air Vanuatu,” Mr Finau i talem.

Jeaman blong Scholarship, Mr Natonga i talem se i kat 35 studen evri wan blong ko stadi long Samoa.

“Ol studen ia oli stap wetem ol famili blong olgeta mo oli wet long flaet ia,” Mr Natonga i talem.

Ministry blong Education mo Training nao i pem flaet blong ol studen ia we i bin ko putum ol Ni-Vanuatu studen long Fiji mo Samoa.

 

 

 

 

 

 

(Visited 329 times, 1 visits today)

About The Author

You might be interested in