Air Vanuatu i wok long flaet reschedule

I posibol blong ol international flaet blong Air Vanuatu i kambak long Sunday.

Air Vanuatu i talem sori bigwan long ol guest we oli afek long ol flaet long wiken ia mo oli stap wok had blong mekem sua se oli kambak hom kwitaem.

Jeaman blong Air Vanuatu, Willie Daniel Kalo i talem long VBTC Nius se hemi wan mechanical isu we hemi long saed blong sefti indikata blong plen.

Air Vanuatu i talem se wan mechanikol problem long airline blong Boeing 737 ia nao i mekem se sins Friday moning, ol international flaet saspen smol taem. Oli talem se ol pat blong plen ia i mas kat blong i save seves bakegen mo oli tekem ovasi mo bae i kasem Vanuatu long tete sava. Engineering tim bae i wok blong plen ia i save operate sef.

Air Vanuatu i talem se oli wok had blong faenem ol niu time blong save land long ol airport we ol pipol i stap long hem blong tekem olgeta i kambak long hom mo blong katem ol nara flaet schedule nekis wik.

Oli talem se bisi xmas sisen ia bae i putum moa time i ko long ol bisi airport ia we hemi no isi.

Wan lokol we hem tu i stak naoia long Sydney airport i talem se seves blong Air Vanuatu hemi rili pua from hemi no stap letem ol kastoma i save taem flaet i kansel.

“Taem yumi ko blo pem ticket oli askem contact details, email mo ol nara infomesen mbe taem flaet i kansel oli no even save talem se wanem i rong,” Hemi talem.

“Yumi spendem mani ia. Impruvum seves ia. Naoia mifala stap ia Sydney ol samting i sas wee plis lukluk long ol kaen situasen olsem.”

Air Vanuatu i askem ol guest we oli afek long ol flaet ia blong jekem ol infomesen online.

 

(Visited 1193 times, 1 visits today)

About The Author

You might be interested in