Airline kansel flaet i afektem pipol

Ova 100 pipol i afek long ol kansel flaet blong tri smol airline from shotej blong fuel long wik ia.

Ol smol airline ia hemi Belair Airways Limited, Air Taxi mo Unity Airlines.

Chief Executiv Ofisa blong Air Taxi, Julia Johnstone, i talem se shotej blong fuel blong plane o wanem oli kolem avgas bae i distembem seves blong ol emergency blong wan sik man mo cofen jata i ko long ol aelan.

Mrs Johnstone i talem se oli stat blong kivim bak mani blong ol pipol we oli bin pem ol ticket mo mekem paymen finis long ol booking ia.

Norma Philip, Bookings mo Sales Ofisa blong Belair Airways Limited, i talem se oli kivim bak mani blong ova 30 pasenja.

“Mo advasem olgeta blong faenem nara wei blong travel i ko long aelan,” Mr Philip i talem.

Unity Airlines i gat wan kwik miting blong reschedulem ol flaet blong hem afta tu wik.

Mrs Johnstone i blamem Pacific Energy from isu ia.

“Mi no save hao nao pasifik energy i nokat plan, hemi no letem mi save bifo, spos mi save tu wik i pas, then mi save mekem wan plan,” Mrs Johnstone i talem.

“Mbe hemi talem 24 haoa nomo we mi dipen long hem; mi nokat wan nara wei blong karem fuel.”

“Mifala i kasem notis long tuesday ia nomo se i nokat fuel; i gat 800 litre blong avgas nomo long Vila mo 200 litre long Santo,” Mrs Johnstone i talemaot.

“Notis ia oli putum aot leit, mo i mekem se mi nokat jens blong mekem schedule blong mifala so naoia i nokat flaet.”

Belair Airways Limited i advaesem vinis ol kastoma blong hem tete moning se bae hemi no mekem eni flaet stat long namba 31 August kasem long 16 September.

Trifala smol airline ia oli harem nogud long wan shot notis we oli just risivim from shotej blong fuel.

Mbe General Manager blong Pacific Energy, Randall Vallette, i talem se dilei blong fuel long kaontri hemi from jenis we shipping Company i mekem.

Mr Vallette i talem se avgas o fuel blong plane hemi schedule fastaem blong kasem kaontri long 13 August, mbe oli reschedulem i ko long namba 2 September mbe long namba 30 August, Pacific Energy i risivim wan nara email long pasifik direct line se kontena ship ia bai i jest kasem Vanuatu long 15 September.

Hemi talem se Pacific Energy i fil se dilei ia i no blong hem mbe hemi from impak blong COVID-19.

Mr Valette i talem se ship we i karem fuel blong ol plane ia i stake naoia long Fiji sins long eli August.

Direkta blong Civil Aviation Authority, Jackie Langati Trief, i talem se shotej blong fuel ia i no afketem Air Vanuatu from hemi usem Jet A power engin.

“Bai hemi no afektem twin otter, ATR, boeing, bae olgeta i stil kontinu blong seves,” Mrs Trief i talem.

“Mbe bai hemi afektem nomo islander aircraft, i kam taon long ol cessna. So, pepes blong notis ia hemi blong advaes se i save gat restriction long air travel mo hemia i dipend long ol airline.”

Transam kampani we i lukluk long ol schedule blong ol ship i konfemem se fuel blong ol smol plane ia bae i kasem Port Vila long 15 September mo Luganville long 18 September 2021.

Avgas fuel blong plane bae i kasem kaontri long tu wik taem.