Airport kontrakta sefti trening

Twenty-five domestik airport kontrakta oli sitdaon long wik ia long wan sefti trening wetem Civil Aviations Authority blong Vanuatu (CAAV).

Ol contrakta ya oli kamaot long ol difren aelan long Torba kasem Tafea.

Seminar(trening) ia hemi blong givim aweness long saed blong sefti meintenens long ol difren domestic airport.

Pascal Alick, we hemi Aerodromes Officer blong Civil Aviations Authority, i talemaot se Civil Aviations Authority blong Vanuatu hemi reguleta we hemi karem aot ol sefti operesen long kaontri mo hemi mas wok kolosap wetem ol kontrakta we oli stap long ol difren aelan.

“Yumi long Civil Aviation yumi bin mekem ol presentesen we ol aerodrome airport patisipens blong yumi long seminar oli harem,” Alick i talem.

“Yumi kat ol presentesen we i bin kam long ol difren sevis provaeda mo ol pilot. Ol pilot ia oli kam blong haelaetem wanem nao ol jalenj mo ol isu we oli stap fesem long wan wan long ol airpot ia.

Mr Alick i talem tu se Civil Aviations Authority hemi wok blong mek sua se ol kontrakta oli save gud long ol polisi blong olgeta blong oli save hao blong manejem ol airstrip blong olgeta tru long ol seminar olsem.

Daerekta blong Civil Aviations, Grace Naparau, hemi talem tankiu long ol kontrakta from oli tingting strong blong tekem pat long sefti seminar ia.

Hemi talem se hemi hop se wan long ol kontrakta ia bambae oli holem tait ol samting we oli lanem long wan wik semina ia.

“Yufala nao ol kritikal pipol we mifala i dipen plante long moa taem we ol pilot blong yumi oli kam wetem ol ripot blong olgeta, bambae i kambak long yufala nao ol man long graon we yufala i hardwok blong mekem ol wok ia,” Naparau I talem.

Charlie Rypark we hemi contrakta long Mystery Aelan Airport long Aneityum, hemi talem se hemi glat tumas blong tek pat long semina ia.

“Festaem taem oli awodem mifala wetem ol kontrak, mifala no rili andastanem mbe wokshop ia hemi helpem mifala blong cater blong andastanem konsenem sefti mo mifala i lanem fulap samting se yu yu ple wan bigfala role,” Rypark i talem.

Director blong Ministry blong Infrastructure mo Public Utilities, Johnson Binaru i talemaot laswan se bambae Ministri i wok klosap wetem Civil Aviations blong impruvum ol airport long olgeta aelan.

Hemi askem tu long ol kontrakta ia blong wok klosap blong infomem ol authority taem oli fesem ol problem.

by trainee journalist, Agnes Herbert.

 

(Visited 1005 times, 1 visits today)

About The Author

You might be interested in