Airports Vanuatu blong katem daon namba blong wokfos

Airports Vanuatu Limited i stap diskas long hao i save katem daon wok fos blong hem folem COVID-19 pandemic.

Chief Executive Ofisa blong Airports Vanuatu Limited, Jason Rakau, i talem se Airports Vanuatu Limited olsem wan state own enterprise, i wan long ol kampani we COVID-19 i bin afektem revenue blong hem mo i had blong holem taet ol staff we hemi ova 200.

Hemi talem se situesen i no jenj i mekem oli tekem sam strong disisen blong kipim kampani i suvive.

“Kampani blong Airports Vanuatu Limited olsem wan airport authoriti hemi depend bigwan long ol revenu we oli kam long air travel mo air traffic,” Mr Rakau i talem.

“Ol revenu o mani we i stap kolek hemi abaot 90 percen.

“Mbe sins long manis March 2020, crisis hemi kam in i mekem se i kat ol boda restriksen oli kam inples mo yumi luk International travel hemi bin stop mo yumi lukim tu domestic travel i bin ko daon bigwan.”

Mr Rakau i talem se “Fes samting we mifala i bin mekem, mifala i stopem ol bigfala projek we mifala i kat, we capital i reservem mo transferem ol finans ia blong meintenem operation blong kampani.”

“Mifala i katem daon ol haoa blong airport operation i kam long dei taem nomo blong katem kost mo aotem operation blong naet.

“Mifala i bin katem ol nara kost interms of utiliti long international terminal, olsem water mo electriciti mo yumi bin putum ol staff blong oli ko long ol outstanding leave we oli bin kat mo lukluk blong katem daon ol haoa blong wok long managemen kasem ol staff abaot 40 percen.”

 

(Visited 419 times, 1 visits today)

About The Author

You might be interested in