Akrimen blong moa lokol prodak expot

Wan moa kampani blong export i saenem akrimen wetem Kavman long wik ia.

Pacific Import hemi niufala kampani we i wantem promotem ol Vanuatu Made prodak ovasi.

Acting Manager blong Marketing long Ministry blong Trade, Donald Pelam, i talem se signing ia bae i mekem se Pacific Import we ofis blong hem i beis long Brisbane, Australia, bae i wok wetem kavman blong tekem ol lokol prodak i ko long Australia.

Hemi talem se Ministry blong Trade i stap wok plante blong expotem ol prodak ia.

“Ol Pacific kaontri oli kat shortej blong ol lokol kakae olsem taro, yam mo manioc, “ Mr Pelam i talem long VBTC Nius.

“Mo hemia i kivim wan opotuniti long yumi blong fidim spes blong shotej ia; Hemia blong yumi sendem olgeta lokol kakae we population blong ovasi i nid blong kakae.

“Export blong ol lokol kakae ia i ko ovasi bae i kat jalenj mbe taem yumi stat sendem wan o tu lokol kakae i ko ovasi, bae i openem rod blong ol nara prodak i ko tu.”

Chief Executive Ofisa blong Pacific Import, Julian Ligo, i talem se nekis wik bae oli mit mo lukluk blong sendem ol sampling blong ol prodak i ko long Australia.

Hemi talem se Memorandum blong Understanding ia hemi blong statem expot blong ol lokol prodak i ko long Australia.

“Taro, yam wetem manioc hemi ol fes sampol blong lokol kakae we bae i ko long Brisbane,” Mr Ligo i talem.

“Yumi bin wet blong wan manis vinis blong stat sendem ol lokol kakae ia i ovasi mbe from yumi nid blong saenem wan kontract blong mekem sua se ol lokol kakae we yumi exportem hemi healti mo kwaliti.

“Akrimen we yumi saenem hemi olsem wan distributing agent mo yumi mekem sua se yumi mitim diman long market.”

Acting Director General blong Ministry blong Trade, Jimmy Rantes, i saenem akrimen wetem Chief Executive Ofisa blong Pasific Import, Julian Ligo.

I no longtaem i pas, i kat sam prodak i ko vinis long New Zealand.

Eim blong Ministry blong Trade emi blong ol lokol prodak i export tu i ko long Austrailia we emi wan market we e dimandem bigfala kwantiti blong ol lokol prodak.