Alegesen blong tu wokman i lus solwota -Australia

I kat alegesen se tu Ni-Vanuatu seasonal wokman i lus long solwota blong Not Queensland, Australia long Friday taem oli ko huk.

Ol famili blong tufala wokman ia i talemaot long VBTC Nius long tete.

John Tari, Papa blong wan long tufala boy we i blong Ambae i stap lukaotem rispon blong Labour.

Mr Tari i talem se ol seasonal wokman we oli stap long semak ples i talem se araon fo long ol boy ia oli bin ko huk long Friday evening(July 8), mo ripot se oli no bin kambak long Satete.

Hemi talem se search i bin go hed long Sunday kasem Monday moning mo Polis long Australia i kolem of search.

Long wan stori we Queensland Polis i ranem long tete lunj taem, i talem se search i involvem aerial, wota mo land aset inkludim helicopta, plen mo volunteer Marine Rescue.

Oli talem se araon long 4.30pm wan long ol man ia, ol man we oli search antap long helicopter i faenem i float wetem waet item long North Barnard Island Group mo Water Polis i ko kasem hem.

Man ia oli tekem i ko long Innisfail Hospital from i lusum heat long body mo hemi bin stap long wota blong plante haoa.

Infomesen se tu boy hemi blong Vanuatu, wan hemi boy blong John Tari mo narawan blong Ambrym. Tufala nara boy wan blong Australia mo Tonga.

“Mi traem blong kondaktem labour be i no posibol; mi traem blong kasem agent blong hem, mi ko kasem haos blong hem be nokat nomo,” Mr Tari i talem.

“Be mi save nomo from wan famili i stap longwe i stap toktok i kam be i no ditel.”

Labour mo Foreign Affairs Dipatmen oli no provaedem eni infomesen yet. Mo VBTC Nius i traem blong toktok long Labour Commissioner long tete tu be i no posibol.

Mr Tari i askem ol otoriti konsen long kaontri blong kivim wan rispon.

VBTC Nius bai hemi kontinu blong traem karem wan ansa.

(Visited 2277 times, 1 visits today)

About The Author

You might be interested in