Ambae Jif; Wai cooperative seves i mas on

Not Ambae Council blong ol Jif i wantem seves blong Wai cooperative long Ambae i kobak nomol blong benefitim ol lokol.

Wai Cooperative i bin damej i no longtaem mo Kavman i bin stopem seves blong hem.

Long wik ia, Council blong Jif ia i bin givim wan leta long Minista blong Ni-Vanuatu Bisnis, Honoroble James Bule, blong talem sori mo oli asurem hem se oli stap wok kolosap wetem ol jif mo ol pipol long Ambae blong i mas kat securiti.

Jeaman blong Not Ambae Council blong ol Jif long Port Vila, Jif John Atkins Arukelana, i talem se oli toktok plante wetem Minista Bule folem interes blong ol pipol long aelan blong seves ia i kobak.

Jif Arukelana i talem se provins blong Penama i stap yet long proces blong rikavari long ashfall blong Manaro volcano wetem Saeklon Harold mo oli nidim sapot.

Hemi askem kavman blong ko hed wetem ol plan blong ministri long aelan blong Ambae.

“Council long Port Vila i wantem talem long ol pipol blong Ambae espeseli long ol pipol blong not Ambae, se wanem we kavman i wantem mekem, yufala i mekem sua se yufala i redi blong tekem pat,” Jif Arukelana i talem.

“Mbe impoten nao blong i kat securiti.”

Minista Bule i talem se bambae i kat sam diskasen yet long isu ia fastaem bifo seves blong cooperative i kohed bakeken.

Hemi talem se ol kaen insiden olsem i stap slowem wok blong kavman.Mbe kavman bae i neva stop blong helpem ol grasrut mo hemi nidim sapot.

Minista Bule i talem tankiu long Not Ambae Council long sitting ia.

Wai Cooperative i stap long east pat blong Ambae.