Ambrym prea operesen i distroem 6,030 klem posen

Prea operesen long aelan blong Ambrym i distroem 6,030 difren kaen posen we oli klem se hemi black majik long Ambrym.

Spokesman blong Ambrym Evangelisim Niu Approach 21, Sumkon Tasso, i talem se namba ia hemi blong faev difren presbyterian session long not, west mo saot east Ambrym.

Mr Tasso i talem se hemia i ripresentem 20 per cen blong prea opereson we oli bin mekem mo las 80 per cen bae God Almighti bae i dil wetem.

“Ol black pawa ia yumi save nemem olgeta; ol pawa we i spoilem wan famili, hom mo bisnis blong i no save kro,” Mr Tasso i talem.

Wan mama blong Endu vilij long saot east Ambrym we i no wantem nem blong hem i kamaot, i talem se fastaem oli stap fraet mo oli kat ol rabis filing nomo mbe oli talem tankiu long operesen we niu approach 21 i kondaktem blong prea mo karem aot ol rabis pawa ia.

Mr Tasso i kol blong ol pipol we oli stap praktisim ol black majik ia blong stop.

Hemi askem ol pipol ia blong nomo kobak tajem ol black majik ia.

“Pipol i no mas kobak tajem,” Mr Tasso i talem.

“I kat wan dikaresen i stap we i kamaot long foret blong ova 300 pipol.

“Yu kobak tajem, yu tajem God mo graon bae i open. Yumi no mas pleple long christian laef blong yumi.

“Taem God hemi kam insaed blong dil wetem ol black pawa ia, yumi no mas kam in from taem yumi tajem yumi tajem curse long laef blong yumi.”

Ambrym Evangelisim Niu Approach 21 bae i kohed bakeken long ol prea operesen blong hem afta long bikfala miting blong Presbyterian jej long Mangaliliu vilij long Efate blong finisim gud ol wok long Ambrym bifo grup ia i muv i ko long nara aelan blong Vanuatu.