Araon 60 eria long Vanuatu i nokat netwok

Kavarej odit blong ol mobael fon seves i faenem samples long 60 eria blong Vanuatu we i nokat akses blong netwok.

Brian Wenji, Regulator blong Telecommunication Radio Communication mo Broadcasting Regulator, i talem se survey ia oli karemaot long 2021.

“Yumi faenem evri spot, we i neva kat netwok kaverej mo olgeta we i kat weak netwok kavarej mo yumi kat list i stap naoia,” Mr Wenji i talem.

“List i stap naoia mo yumi stap wok folem. long June 2021, yumi bin saenem wan akrimen we hemi pat blong universal akses polisi blong rolemaot long twenty eria long Vanuatu ia hemi ol bigfala eria mo taem mi talem bigfala eria i save kavemap haf blong aelan.

“I no minim se wan tawa nomo bae kavremap wan aelan. Yumi save putum wan tu o tri tawa long wan bigfala eria. So 2o eria yumi bin saenem wetem trifala operata(Vodafone, Digicel Vanuatu Limited mo Wantok Vanuatu). blong extendem eria blong extendem kaverej.

Mika Albie, wan lokol long Merelava, i talem se i nokat netwok long aelan ia mo plante pipol i faenem i had blong komuniket.

Mr Wenji i talem se Telecommunication Radio Communication mo Broadcasting Regulator i wok tugeta wetem ol telekomunikeson provaeda blong mekem sua pipol i risivm 100 per cen seves  blong ol mobael fon.

“Twenti eria blong abaot 60 eria yumi taget so yumi stat long Saot i kam we oli onem sam tawa vinis”Mr Wenji i talem.

“Long Banks mo Torres grup, yumi putum sam VSAT mo komuniti wifi long evri skul long Torba Provins. Mo tu i kat sam netwok tawa i kerap. Long eli yia ia oli lonjem fo tawa long Tanna.

“Mo yumi hop blong kompletem evri eria ia mo wantaem luk se i nokat man i stap behaed mbe oli kat akses long netwok long haos.”

Wan Jif long Merig aelan long Banks grup, Jif Adam Noah, i talem long VBTC Nius se ol pipol i mas wokbaot blong tu haoa i ko daon long solwota blong toktok long fon.

Jif Noah i kol long Kavman blong luksave nid blong olgeta.

Sanma Presiden, Malmalangi Tavui, i talem se Santo hemi bigfala aelan blong Vanuatu mbe netwok blong Digicel mo Vodafone i nogud nomo.

“Ol eria olsem Big Bay bush, Big bay inlan, West mo not west Santo mo saot Santo, pipol i fesem had taem blong toktok long fon,” Mr Tavui i talem.

“Kavman i mas luksave from taem i nokat netwok, pipol i strakol blong kasem ol impoten infomesen blong saeklon o tsunami blong oli pripea blong stap sef o ol emergency blong ko long hospital.

Head blong Business Solution long Digicel Vanuatu Limited, Rupert Benson, i talem se oli glad blong wok wetem Telecommunication Radiocommunication mo Broadcasting Regulator mo ofis blong Prime Minista blong muvum Vanuatu fowod.

“Digicel i kam long Vanuatu 13 yia i pas mo bae mi mas talem se Vanuatu hemi wan long ol jalenj kaontri olsem plante pipol i save from hemi tru long Saeklon Pam long 2015 mo saeklon Harold long 2020,” Mr Benson i talem.

Praem Minista, Honoroble Bob Loughman i lonsem fo tawa blong vodafone long eli January ia hemia long Saot Tanna.

 

 

 

(Visited 188 times, 1 visits today)

About The Author

You might be interested in