Archery i statem trening

Archery trening blong faenem ol niu pleia hem i kik off finis.

Vanuatu Archery Association Koj, Francis Runa hem i talem se trening ia hem i kik off long las wiken afta we kavman hem i alawem bak ol spot aktifiti blong save kohed be wetem ol rul blong COVID-19.

Hem i talem se ol archery pleia mo sam pleia long ol narafala spot i tekem pat long trening ia long las wiken mo lanem hao blong yusum bo mo aro blong sud.

Archery hem i wan spot we hem i involfem ol pleia blong yusum bo mo aro blong sud.

Mr Runa i talem se trening ia i blong faenem ol niu pleia blong save stap tekem pat long ol fiuja tunamen blong Archery.

Koj ia i talem se archery hem i wan gudfala spot blong wan pleia i save lanem disiplin long hem.

Hem i talem se hem i gud from sapos olgeta pikinini we oli strong hed long skul o oli no stap lisin long olgeta peren long haus, kem ia hemi save disiplinim olgeta.

Mr Runa i talem se, kem ia i save mekem olgeta patisipen oli save fokas long aim blong olgeta mo semtaem emi wan gudfala kem blong helpem yu relax.

Hem i talem se spot ia hem i stap long taem vinis we olgeta olfala oli bin yusum bo mo aro blong hunt mo tu olsem wan weapon blong protektem olgeta pipol long war long taem bifo.

(Visited 6 times, 1 visits today)

You might be interested in