Astrazeneca vaccine i sef

World Health Orgnisation i rikomendem ol pipol blong tekem COVID vaccine Astrazeneca from i sef mo efektiv.

Communicable Disease Ofisa long Ofis blong World Health Organisation long Vanuatu, Dr Phillipe Guyant, i talem se vaccine ia hemi best we organisation i jusum blong raon wol i yusum.

Dr Guyant i talem long VBTC Nius se vaccine i kam blong helpem pipol i no kasem virus ia.

Hemi talem se vaccine ia hemi no rili 100 per cent mbe hemi stil save help.

“Sapos wan persen i kasem sik blong suka o high blood presa, hemi stap long hae janis blong kasem COVID -19 virus,” Dr Guyant i talem.

“Hemi stap long denja blong sik moa mo save ded.

“Mo hemi moa gud sapos hemi tekem vaccine blong stap sef.”

Dr Guyant i talem se plante long ol COVID-19 vaccine i kat ol saed efek blong olgeta mbe hemi smol nomo.

“Ol saed efek ia i hapen nomo, long antap arm blong yumi, ples we oli stikim yumi long hem i so o hed bae i so,” Dr Guyant i talem.

“Ol pipol i might experiencem smol feva mbe hemi blong wan o smol taem nomo.

“Naoia yumi no luk tumas ol saed efek ia. Long Fiji i kat 6000 vaccine dose mbe ol pipol i no experiencem tumas ol saet efek.”

Long Fiji i kat seven Vanuatu Kavman sponsor studen long Fiji i tekem fes dos blong vaccine ia long manis ia April mo sam oli wet blong kasem stik long ol dei i kam.

Robson Tigona, wan Ni-Vanuatu Teaching Assistant blong climate change mo disasta management long Laucala Campas long Fiji, i talem se vaccine blong COVID ia i oraet nomo.

“Afta we oli stikim mi vinis, long nekis dei mi feva smol mbe hemi nomol; Mi ko long wok mo mi mekem sam exercise olsem ron ron,” Mr Tigona i talem.

“Taem yumi filim ol saed efek olsem hemi soem se vaccine ia i stap mekem wok long bodi blong yumi.”

Dr Guyant i talem se hemi impoten blong pipol i tekem vaccine.

“Taem yumi lukluk long ol nara kaontri olsem long Europe, ol kes blong COVID i ko daon from oli pipol i tekem stik blong vaccine,” Dr Guyant i talem.”

Vaturisu Council blong ol Jif long Efate aelan i mekem kol tu blong pipol i mas tekem vaccine blong stap sef.

Jeaman blong Vaturisu Council blong ol Jif, Jif Simeon Poilapa, i talem se Vaturisu i sapotem kavman long rolaot blong COVID-19 vaccine.

Jif Poilapa i talem se Efate hemi mein doa blong ol pipol i kam ovasi mo pipol blong Efate oli stap long risk from oli stap long wan ples we oli save kasem virus  ia isi nomo.

“Vaturisu hemi wantem protektem ol pipol blong hem mo hemia nao hemi askem ol pipol blong Efate blong mas tekem meresin,” Jif Poilapa i talem.

Spokespersen blong COVID-19, Russel Tamata, i talem se tim blong health bae i mekem moa awenes long ol aelan abaot vaccine ia.

“Mi askem koperesen blong ol pipol taem aweanes tim i ko long ol aelan long nekis wik,” Mr Tamata i talem.

Dr Guyant i talem se awenes ia hemi blong infomem pipol long wanem hemi yus blong vaccine.

“Wanem ol saed efek blong hem mo resen blong pipol i tekem vaccine ia,” Dr Guyant i talem.

“Long wei ia ol pipol i save kam blong tekem vaccine ia long wanem deit mo taem.”

Dr Guyant i talem se ol persen ova 18 yia i save tekem vaccine ia mbe kwesten nao i stap long olgeta pikinini se oli save tekem vaccine o no.

“I kat ol klinikol triol i stap hapen long ol pikinini mo risal i no kamaot yet,” Dr Guyant i talem.

“Mo long ol dei i kam bae yumi stap luk ol risal blong hem blong ol pikinini i save yusum.”

Dr Guyant i talem se oli nosave talem stret deit blong arivol blong vaccine from i dipen.

“Naoia we boda lok daon from COVID, hemi had lelbet mbe yumi wet nomo,” Dr Guyant i talem.

 

 

 

(Visited 229 times, 1 visits today)

About The Author

You might be interested in