Australia i mas stopem fossil fuel-Climate Change Minista

Minista blong Climate Change i talem se Australia i mas stopem fossil fuel sapos hemi wantem pacific i sapotem hem blong hostem climate summit long 2026.

Australian kavman hemi bin lonjem wan campaign long COP27 long Egypt blong hostem event ia long fo yia taem.

Campaign blong olgeta hemi blong helpem ol Pacific kaontri blong oli co-hostem event ia.

Hon. Ralph Regenvanu hemi talem se blong pacific i supotem hemia bai mas kat condition long hem.

Long international Nius mo long VBTC Stret Tok Program, Mr Regenvanu hemi talem se bai oli no save sapotem tingting sapos Australia hemi stap kontinu blong investem moa mane long Fossil fuel.

“Sapos yu serious blong helpem Pacific we hemi talem vinis se hemi stopem evri samting naoia.

“Sapos yu wan fren yu stopem naoia. Mi biliv se oli save mekem. Hemi wan strong isu blong Australia from oli dipen bigwan long ol fossil fuel. Yumi glad long niu kavman we i kam in, hemi komitim hem moa blong dil wetem climate change so hemia nao mi talem komen ia se sapos Australia wantaem sapot blong mifala hemi mas mekem moa aksen blong mifala i sapotem yufala wetem ol heart blong mifala. I no se mifala i sapot yufala mbe stap kros bakegen long wanem yufala i stap mekem long climate change.

Australia Minista blong International Development long Pacific, Pat Conroy. we i stap long Vanuatu naoia, i talem se oli rispektem toktok blong Minista Regenvanu.

“Mi andastan mo rispektem tinktink blong hem long climate change from pacific nao i afek bigwan mo from hem ia nao Australia i stap step ap; Niu Australian kavman i komitim hem wan blong tekem aksen agensem climate change i ko long renewable energy. Mifala i jes pasem nomo ol niu climate loa blong traem tagetem aot 43% blong emission long 2030. Long 2030 mifala i wantem eim blong kat 80% renewable energy. Long las budget mifala i statem Pacific Climate Infrastructure Financing Facility blong helpem ol pacific kaontri. Mo mifala i stap aloketem 2 billion dola blong ova faev yia blong climate finans long Wol mo inkludum 700 million dola long pacific,” Minista Conroy i talemaot long wan Media press conferens.

Minista Conroy i talem se wetem komitmen blong curent kavman long saet blong climate jenj bai oli save wok kolosap wetem Climate ministry blong lukluk long ol konsen we kaontri i kat.

 

 

(Visited 48 times, 1 visits today)

About The Author

You might be interested in