Australia i redi blong mekem jens-Renewable Energy

Australia i redi blong mekem ol jens long saed blong renewable energy.

Hemia rispon blong Foreign Affairs Minista blong Australia, Penny Wong long wik ia folem stand blong Vanuatu long COP27 from klaemet jens.

Stand ia, Minista blong Climate Change, Ralph Regenvanu hemi tekem blong Australia i mas stop blong invest long fosil fuel sapos i wantem sapot blong ol Pacific nation blong hemi save hostem neks bigfala COP31 blong UN klaemet konvensen, long 2026.

Long visit blong Senata Penny Wong wetem delekets blong hem long Port Vila, hemi pointem aot se kavman blong hem i redi blong mekem jens folem stand blong Vanuatu from mata ya.

“Mifala i stap lukluk blong mekem wan bigfala jenis blong 80% renewable energy mo hemi wan bigfala muv; So wanem bae mi talem hemi se mifala i komited,” Ms Wong i talemaot.

Hemi talem se nating long bigfala benefit blong expot blong fossil fuel long ekonomi blong Australia, kavman blong hem i harem save vois blong Vanuatu mo i luksave ol impak blong klaemet jens long kaontri mo tu long ol nara Pacific aelan nation.

Ms Wong i talem se Australia bai i tekem vois blong Vanuatu olsem fes stand blong Pacific from klaemet jens, mo ol nara Pacific kaontri i ko long intanasonal forum ya.

Hemi talem se risen blong hostem neks COP31 long 2026 hemi blo leftemap vois blong ol smol aelan nason blong Pacific from klaemet isiu.

“Hemi from harem ol vois blong ol pacific aelan nation hemi wan powerful steitmen long United Nation proses; From mifala i biliv se konfrens ia bae i harem vois blong ol Ni-Vanuatu mo ol nara pacific kaontri,” Ms Wong i talem.

Senata Penny Wong i talem se Australia mo Vanuatu i gat plante wok i stap blong tugeta kaontri i wok long hem mo Australia i wantem bildim strong mo equal patnaship wetem Vanuatu blong save adresem ol isu ia.

by Tiffany Baldwin.

 

 

 

 

 

(Visited 84 times, 1 visits today)

About The Author

You might be interested in