Bank seves blong rurol Sanma

Sanma Provincial Kavman i anaonsem seves blong National Bank blong Vanuatu long rurol Sanma.

Presiden blong Sanma Provincial Kavman, Malmal Langi Tavue, i anaonsem long selebresen blong Sanma Dei.

President Tavue i talem se Sanma Provincial Kavman i mekem akrimen wetem National Bank blong Vanuatu blong setemap ol branj blong hem long Tasmalum long South Santo eria wan mo wan long Belvus long Bigbay Coast eria kounsel.

Mr Tavue i anaonsem tu se Sanma Provincial Kavman bae i stap openem long tumoro friday niufala council haos blong South Santo eria wan we i set up long Tasmalum. Hem i talem se Sanma hem i gat plan tu blong stanemap fo ekonomik senta.

Hem i talem se Pacific Petroleum hemi apruvum long wik ia tu se bae bisnis ia bae i setemap wan fuel station long Tasmalum mo Belvus.

Mr Tavue i talem se ol fuel station ia bae oli open lo nekis yia.

Hem i talem se Sanma hem i luk fowod tu long reopening blong Lajmoli eapot long West coast Santo. President Tavue i talem se hem ia hem i ol impoten seves we ol pipol long rurol Sanma i nidim espeseli long not, wes mo saotwes Santo.

Tete hem i makem 27 yia blong Sanma provincial kavman.