Bebe i ded from no health sapot

Wan eight manis bebe long Saot East Ambrym i ded long wik ia from hemi sitsit wora mbe absens blong nes long Utas Health Center i mekem se hemi nosave kasem health sapot.

Jif long Saot East  Ambrym, Jif Jimmy Larry, i talem se hemi arem nogud tumas mo hemi seken taem we hemi kol from wan kwalifae nes.

Jif Larry i talem se from long wik ia i kat wan eight manis bebe we i sik bigwan mo i ko long Utas health senta blong kasem tritmen mbe from i nokat eni nes so hemi mas travel longwe wetem mama mo Papa blong hem long bot blong ko kasem tritmen long Liro Health Center long Paama.

Jif Larry i talem se bebe ia i ded long Thursday wik ia.

“Long mi olsem wan jif, mi plis long Malampa health blong lukluk kolosap long ol seves blong health long provins ia blong helpem pipol blong stopem sik i karemaot laef olsem,”Jif Larry i talem.

“Mi wantem se wan nes i kam kwiktaem long Kristmas mo New Yia sesen ia from aksiden i save hapen eni taem o wan man i save sik bigwan bakeken.

“Mi kolem Kavman mo Ministry blong Health blong lukluk kwiktaem blong sendem wan kwalifae nes i kam stap wetem aid nes blong helpem ol pipol

“Mama mo papa blong bebe ia i tekem bebe ia i kambak long Saot East Ambrym mo oli bin berem hem long yestete.”

Eria Administrata blong Paama, Cyrus Willie i kasem konfemesen long nes blong Liro Health Center se taem bebe ia i kasem Paama blong tekem tritmen, nes i luk se hemi bin sik bigwan vinis.

Mr Willie i talem se kondisen blong sik ia nao i mekem se hemi ded.

“Plis Kavman i mas lukluk kwiktaem long isu ia mo help,”Mr Willie i talem.

Salome Kenneth, Malampa Public Health Manager i talem se hemi no awea long insiden ia.

Mrs Kenneth i talem sori bigwan mo hemi asurem ol pipol blong Saot East Ambrym se wan nes bae i kam provaedem health seves long Utas Health Center i no longtaem.

“Kavman i apruvum vinis blong wan nes i kam mbe yumi wet long proses blong Public Service Commission mo arenjmen blong muvum nes ia,”Mrs Kenneth i talemaot.

“Proses i tekem taem mo i nosave hapen ova naet. Absens blong nes i mekem plante jalenj long Saot East Ambrym mo yumi hop nes ia i kam blong help aot.

Mrs Kenneth i talem se nes we i bin stap serve long Utas Health Center hemi no ronwe mbe plan i stap blong hemi transfer i ko wok long Santo.

Hemi talem se resen from wanem hemi ronwe ariap hemi from pikinini blong hem i sik bigwan mo hemi mas aot blong ko luk hem.

Jif Larry i talem se hemi krae blong ol pipol long Saot East Ambrym naoia blong wan nes i kam helpem ol pipol long Saot East Ambrym afta we oli bin luk ded long wik ia.