Wan faet i kirap long fiji bitwin ol man Fiji long Namada riva wetem wan chinese konstraksen kampani.
China Railway First Group kampani emi rejektem kleim blong ol grup blong ol pipol long Namada, we i talem se ol steel paep we kampani ia i putum i damejem marine laef.
Radio New Zilan i talemaot tedei, se Island Business Magazine i ripotem se ol 150 mita paep ia, kampani i bin ususm long projek blong dredgem o skupum aot ol samting long rivabed.
Be long taim blong wan storm o strong win we i jes pas, ol paep ia i wash i go daon long riva mo end ap long rif kolosap Namada.
Kampani ia gavman blong Fiji i stap kontraktem hem blong wok long fulap ol konstraksen projek long kaontri.
Mo long June yia ia, kampani i statem 2.1 million US dola projek blong hem blong apgredem Laucala kampas blong USP, long Suva.