Folem Situesen blong Manaro Volcano we i stap afektem AMBAE naoia, Ministri blong Edukesen i stap askem ol Prinsipol mo ol Parent blong AMBAE we oli bin mouv volentarily i ko long ol difren provins, blong ripotem mo rejisterem ol skul age piknini long ol respektif provinsol edukesen ofis.

Ministri blong Edukesen i talem se ol provinsol ofis bae oli asist blong faenem wan speis blong ol pikinini concern long eni skul, blong alowem hem blong kontinu long stadi blong hem.

MOE i askem long ol parent se sapos oli faenem wan speis blong ol pikinini blong olgeta, be oli mas ko rejisterem hem long Provincial Edukesen Ofis we oli stap long hem.

Ministri blong Edukesen i askem strong long evri Prinsipol blong eni skul long Vanuatu blong akseptem mo provaedem edukesenol avenue blong eni pikinini blong Ambae aelan.

Ministri blong Edukesen i stap wan spesel call i ko speseli long ol Prinsipol blong ol skul long Ambae we bae oli mouv i ko long Maewo, blong oli mek sua blong mouv wetem evri stationary blong skul blong olgeta mo ol nara item we oli save mouvoumaot blong helpem transition blong Edukesen continuity long nara skul we bae oli ko stap long hem.