Ol bebi we oli ekspos long zika vaeres bifo we oli bon, oli save fesem ol helt problem, ol US ofisol oli talem.
US Senta blong Disis Kontrol mo Prevensen, i analaesem 4800 mama we oli gat bel, long Marshall aelan, Federeted Stet blong Mikronesia mo Amerikan Samoa, bitwin long 2014 mo 2016.
Stadi blong olgeta i soem se 1 long 7 bebi oli gat 1 o moa helt problem we oli tingting strong se Zika nao i kosem.
Sik Zika oli linkim hem i go long fulap taosen suspekt keis blong mikrosefali, we emi wan sik we i lukim wan bebi i bon wetem wan unusual smol saes blong hed, ol ae i no nomol mo damej long ol nev.
Helt agensi ia emi talem se naoia oli biliv se vaeres blong Zika maet i kosem fulap ol narafala defekt o sik blong ol bebei i no bon nomol, even spos mama blong bebi i no bin soem saen blong zika long blad long taem blong blad tes blong hem.