Tedei i lukim fes Nevi ship blong Australia i visitm Vanuatu long yia ia.
HMAS Armidale 2 i saed long Lapetasi wof blong Port Vila long 8 klok tedei long moning.
Lieutenant [Leftenan] Commanda, Paul Harman nao emi Komanding Ofisa wetem wan 39 memba crew, we 9 oli ol woman.
Lieutenant Komanda Hardman i talemaot se HMAS Armidale emi wan nevi patrol bot blong Australia we i stap lukaotem ol solwota blong Pacifik.
Mo bambae oli stap long Vila long wan 3-dei visit, mo hem wetem crew blong hem oli glad tumas blong save kam long kaontri.
Defens Attashe blong Australia long Saot Wes Pasifik, Wing Commanda Jonathan Durden, we i beis long Solomon aelan tu i stap long Vila blong welkamem HMAS Armadale 2.
Long said blong hem, hem i talem se Defens fos blong Australia emi wok gud wetem Defens fos blong Vanuatu from fulap long ol praktis mo prosija blong tufala fos i semak, mo emi olweis wan pleasure blong wok wetem ol memba blong Vanuatu defens fos.
Lieutenant Commanda Kylie Turnbull, blong Australia we i beis long Vanuatu emi bin stap tu long Lapetasi wof tedei blong welkamem mo bodem HMAS Armadale.
Lieutenant Turnbull i talem se Armadale 2 Austal wan kampani blong Australia nomo i bildim hem mo hem stat blong sevisim Australia mo Pasifik long 2003.
Mo long las yia hem oli wok long hem bakegen mo bambae emi sevis kasem yia 2021.
Lieutenant Commanda Turnbull i talem tu se bambae oli replesem hem wetem wan niufala Guardian ship we bambae i semak olsem replesmen blong lokol patrol bot, RVS Tukoro.
Liz Harris olsem Pablik Afeas Ofisa blong Hae Komisen blong Australia long Vila i talem se i gat ol aktiviti we bambae Komanda mo ol crew blong Armadale 2 i engage tugeta long hem long ol tri-dei we i stap kam.