Vanuatu emi nid blong gat ol loa we i dil wetem cyber crime o ol kriminol aktiviti we i hapen tru long ol komputa, infomesen teknology, virtual rialiti,espesli tu long intanet.

Wan long ol mein risen hem i from ol kot oli akseptem ol evidens we i stap long elektronik fom blong pruvum o dispruvum wan mata.

From risen ia i nid blong gat ol gudfala legol provisen we i fasilitetem ol investigesen blong ol cyber kraem mo tu ol kraem we i rilet tu long cyber use.

Long ol toktok we i kamaot long Cyber crime legislesen wokshop yestedei, i shoem se Vanuatu emi stap wok blong save gat ol legislasen o loa we i stap inlaen wetem ol intanasonal standed.

Espesli wetem Cyber Convensen blong Budapest, Hungari, we ol kaontri blong wol i saen long hem.

Long Pasifik Kingdom blong Tonga i ratifaem konvesen ia finis.

Be Vanuatu i stap wok blong acceed long convensen ia.

Gavman blong Australia i helpem Vanuatu wetem hemia, tru long sapot blong ol specialist we i kam ovasi blong stap long Wokshop ia.

Opening blong wokshop ia i bin tekem ples yestedei, Mande 20 August, 2018, long Vila.