Long Australia, Praem Ministaship blong Malcolm Turnbull emi stap vulnerable iet folem ol late-naet resignesen from ol senia minista, mo ripot blong ol liberal MP we oli stap switchim alegens i go long Peter Dutton.

ABC i andastandem Minista blong Helt, Greg Hunt mo Minista blong Tred, Steve Ciobo oli ol letes frontbencha we oli ofarem resignesen, be oli no akseptem iet.

Mr Dutton emi kontiniu blong presarem Mr Turnbull, mo ol sapota blong hem i talem se i laekli blong gat wan jalenj we bae i kam long fiutja.

Intansasonal Developmen Minista, Concetta Fieravanti-Wells i risaen tu mo emi farem wan parting-shot taem hem i akusim gavman ia blong stray i go long left tumas.

Wan nara 5 junia gavman minista oli ofarem resignesen blong olgeta finis tu.

Mo hemia i krietem wan hed-sore long reshufol blong Mr Turnbull.

Ol source i talem se i gat 2 o 3 moa liberal we oli drift i go long Mr Dutton ovanaet.

Hemia bambae i livim niufala backbenja ia wetem 4 o 5 short long 42 we hem i nidim blong sizim lidaship.

Ripot i talem se oli difens strategi blong PM Turnbull, emi blong talem se wan win blong Mr Dutton, bambae i minim wan eli eleksen we party i no prepare from.

Toktok i talem se i save gat wan eli eleksen by Fraede wik ia, mo pati i talem se bambae em i tap lonwe bihaen long Leba Pati.

Ol Nasonal tu i divaed smol long tingting blong olgeta, sam long ol frontbenja i resem posibiliti blong oli krosbenj spos Mr Dutton i win.

Be sam narafala oli advaes agensem.

Minista blong Foren Afea, Julia Bishop, emi talem se gavman i mas lisen long ol bakbenja.