Vanuatu bae i sendem wan bij volibol yut tim long kategori blong ol gel i go kompit long 2018 Yut Olympic Games long Buenos Aires, Argentina long manis Oktoba.

Hemi namba 3 yut olimpik kems we Vanuatu i part long hem evriwan mo long bij volibol bambae i seken taem blong hemi go kompit long hem.

VASANOC i jusum bij volibol tru long wild cat invitation mo bae hemi joinem nara spot disiplin blong go flaem flag blong Vanuatu long saot America.

Four yut bij volibol pleia i stap long pri skwad naoia mo trening blong olketa i stap gogohed gud.

Koj blong tim, Joshua Toares i ripotem se tim i just kam bak long kantri afta long wan wik trening camp long Cold Coast Australia mo i gat difrens long wanwan pleia kompea long ol manis we i pass.

Loti Joe we i stap long seken tim blong Vanuatu bij volibol mo hemi bin go long las yut olimpik kems i diskraepem tim blong naoia se oli well pripea mo hemi wantem se oli muvum posisen blong Vanuatu we oli putum long las 4 yia.

Wan long ol pleia we i stap long pri seleksen tim i talem se hemi plante wok long hem from hemi wan studen mo hemi mas atendem trening oltaem.

Ludvine Tebeim i talem se nomata long jalenj ia be hemi manejem taem blong hem from hemi wantem tumas blong reprisentem kantri.

Vanuatu Volleyball Federation bae i sidaon long next wik blong finalisem tim blong Argentina.