Long Ol Federeted Stet blong Mikronesia, olgeta Chuukese oli kontiniu blong stanap strong se oli mas kasem independens blong olgeta aot long FSM.

I gat ol woning we i kamaot agensem ol efot blong aelan grup ia se bambae i gat negetiv impakt long olgeta.

FSM emi inkludim ol stet blong Pohnpei, Yap, Kosrae mo Chuuk.

Ripot we i kamaot long Radio Niu Zilan las naet, i talem se samples 50 000 Chuukese bambae oli pat blong secession vote, o vote blong kamaot long union blong ol stet ia.

Vote ia bambae i tekem ples long Maj, nekis yia, 2019.

US Ambasada long FSM, Robert Riley, i talem se spos Chuuk i kamaot long union blong ol stet ia, bambae hem i nomo save risivim Mane o funding we USA i stap givim long FSM kaontri.

Riley i talem se Compact Blong Free Associesen emi bitwin USA mo FSM, so emi no kavaremap wan seperet Chuuk entiti.

Emia emi inkludim direkt imejensi asistens blong US Coastguard mo ova 50 gavman komponen we i beis long Chuuk naoia.

Mo tu ol immigresen privilej blong travel i go long USA.

Lokol Chuuk politisen, Sabino Asor, i talem se i no gud blong US ofisol ia i usum ol agumen blong imigresen i go long US olsem wan risen blong stap wetem FSM.

Asor i talem se taem ol olfala oli saenem union agrimen ia, oli no minim se bambae oli stap foreva long union ia.

Emi kontiniu blong talem se emi wan disgreis from union ia emi blong USA i help blong developem full kaontri ia i kam long wan sastenabol level.

Be hemia emi no mekem.

Asor i talem se secession vot ia bambae i gohed olsem oli planem mo hemi wan lokol gavman platform.

Bambae oli pipol blong Chuuk oli disaed.