Food Security mo Agriculture Cluster i continue blong distributum ol local food supplies i go long two diffrent community long Maewo.

Distribution blong ol local food supplies ia hemi go long village blong Navenven mo Bospole.
Ripot we VBTC News i kasem se, ol local food ia, hemi includum ol bundles blong taro, basket blong Manioc, banana mo ol vegetable.

Distribution blong ol kakae ia, hemi folem nomo evacuation blong ol pipol blong ambae we oli live naoia long island blong Maewo mo Food security by hemi continue blong distributum ol kakae i go long nara community truout long wik ia.

Over long 1000 basket blong ol vegetable seed we oli distributum vinis i go long ol host community mo long ol household evacuees.

Department blong Agriculture i acknolegem Oxfam blong save sapotem Food Security mo Agriculture Cluster wetem ol vegetable seed i go long ol community blong wan medium term plan.

Long yestedei, thrusday 23 August, 2018, Cluster tim hemi go aot blong pem ol cattle or beef long ol cattle farmer long Maewo blong saplaem i go long ol host community blong ol evacuees.

Ripot we VBTC I kasem i talem tu se long said blong kilim ol buluk, bambae i kat wan meat inspecter tru long FSAC bae hemi stap blong inspect mo mekem sure se buluk hemi safe mo hemi mitim ol Hygine safety standard blong ol pipol i save kakai.