Departmen blong Wota long kaontri i luk save health blong ol man blong i must stap healthy oltaem mo hemia nao hemi stoppem tabu blong ol man i swim long harbour or solwora blong Port Vila.
Director blong Wota Risos long kaontri, Erickson Sammy i stressem se high level blong bacteria we i stap long harbour blong Port Vila, oli callem coliforn, mo i save passem sik, mo sik ia i save stap long full life taem.
Hemi talem se olgeta bacteria ya iko insaed long harbour blong Port Vila tru long olgeta activities mo ol developmen long Port Vila mo ol area kolosap.
Mr Sammy i talem se tabu blong swim long harbour blong Port Vila hemi gazette long namba 17 August mo naia hemi kam wan legal notis blong no must swim long aria ya.
Tabu blong swim ya i start long Fatumauri Bay kasem long Origin gas.
Departmen blong Wota Risos i bin stap mekem olgeta wota quality testing sins long 1999 kasem yia ya tru long wan project, mo oli faenemaut se i kat enaf quality data blong bakem ap tabu ya.
VBTC news i kasem information se blong swim long aria blong Kawenu, Iriririki mo Lapetasi wharf i safe.
Wan ofisa blong Port Vila Municipaliti i talem se sins las yia i kam oli bin toktok long olgeta business aos long town blong must divertem olgeta waste or doti blong olgeta i go long graon nomo.
Hemi talem se oli receivem sam gudfala feedbak long wan compani we i tekem step blong faenem wei blong karemaut doti blong hem, mo kampani nomo i lukluk long kost blong hem.
Hemi talem se issu blong waste i go down long solwota hemi stap longtaem mo wan gud example hemi wan popular night club long town we fulap taem municipal i must mekem olgeta i fine from fulap man i kam long club mo drout o mekem eni nara waste mo long end blong dei i go tru long drainage ya mo i go down long solwota mo affectem olgeta marine laef.
Director Sammy i talem se Departmen blong Wota i banem swim from bacteria i save kam long contact tru long nose mo mouth.