Lida blong Opposition blong Fiji, Ro Teimumu Kepa i talem se Vanuatu ibin tekem wan strong disisen blong helpem West Papua blong kasem fridom blong hem tru long United Nations.

Mo hemi askem long kavman blong Fiji mo ol nara kavman long region blong shoem solidariti mo stanap tuketa blong helpem West Papua.

Ro Teimumu i talem tank yiu mo salutim Praem Minista blong Vanuatu, Charlot Salwai Tabimasmas blong shoem wan tru lidaship, mo shoem se hemi wan tru Melanesian brata blong ol pipol blong West Papua.

Mo hemi talem se SODELPA pati long Fiji we i stap long Opposition, i sapotem hem long mission ia, mo sapos SODELPA i lidim wan kavman long Fiji, bae hemi sapotem West Papua.

Lida blong Opposition blong Fiji i mekem kol tu long kavman blong Fiji blong stop blong betrayem ol pipol blong West Papua.

Ro Teimumu i talem se kavman blong Fiji mo lida blong hem, Voreqe Bainimarama ibin toktok plante abaut Melanesian Unity, be nomata long hemia, oli bin stikim baksaed blong ol Melanesian pipol blong West Papua, taem we oli refuse blong sapotem long taem request blong olketa blong kamaut long colonial control long homekraun blong olketa, aut long Indonesia.

Mo hemi adem se aksen blong olketa hemi wan shame, taem i luk oli salemaut famili blong olketa long West Papua iko long Indonesia.

Ro Teimumu i talem se truth hemi oli frait blong challengem kleim blong Indonesia long sovrenti ova long West Papua.

Mo hemi adem se oli shud folem example blong Vanuatu.

Hemi talem se struggle blong West Papua hemi wan samting we oli save long Fiji, tru aut long region, mo long wol, be i kat sam we oli stil no tok aut blong helpem ol pipol blong West Papua.