Gavman blong Vanuatu i lonsem Nasenal Grin Eneji Fand long yestedei long Port Vila.

Gavman tru long Ministri blong Klaemet Jens i lonsem nasenal grin eneji fand ia afta we nasenal palemen i apruvum mo steit loa i gazetem Nasenal Grin Eneji Fan Akt namba 10 blong 2018.

Nasenal Grin Eneji Fand hemi fes nasenal faenansing sekson blong Vanuatu eneji sekta we bae i givhan tuwod karem aot ol objektiv mo taget blong apdeited Nasenal Eneji Rod Map blong 2030.

Projek Maneja blong Nasenal Grin Eneji Fan, Georgewin Garae, i talem se Longsing blong Nasenal grin eneji Fan hemi wan maelston divelopmen.

Long taem blong lonsing ia, Minista Ham Lini Vanuaroroa we i responsibol long klaemet jens mo eneji i talem se Nasenal Grin Eneji Fan bae i pleiem wan impoten rol blong helpem Vanuatu akjivim ol polisi taget blong hem.

Minista blong Klaemet Jens i handem ova tu long taem ia, apoenmen leta blong ol Bod blong Darekta blong Nasenal Grin Eneji Fand we i tekem tuketa ol Darekta blong ol difren Gavman Dipatmen mo ol nara instituson we oli stap tedei long kantri.

Jeaman blong Bod blong Nasenal Grin Eneji Fan, hemi Darekta Jenerol blong Ministri blong Klaemet Jens we hemi, Jessy Benjamin.

Fes miting blong Bod blong darekta blong Nasenal grin ejenji fan ia i sidaon yestedei aftenun blong lukluk long ol opereson plan blong Nasenal Grin Eneji Fand.