32-19 viktri blong Argentina akensem South Africa long las Sande i dropem posisen blong ol Springboks i go long namba seven long wol ranking.

Olsem wan pawa haos long ragbi mo ragbi wol jampion blong samtaem, South Africa i sek bigwan long posisen blong hem ia.

Ripot i talem se Springboks i stap anda long komand blong niu koj, Rassie Erasmus mo las yia oli mekem gud taem ol winim England mo Argentina.

Ol risal blong ol match blong hem long yia ia i no promesing mo hemi semak problem we tim i bin go tru long hem long eli 2017.

I gat lukluk i stap se Springboks tin bae oli gohed blong fesem jalenj taem bae hemi mitim Australia long Brisbane mo All Blacks long Wellington next manis.

New Zealand All Blacks i kipim top spot long wol ragbi mo Wallabies i rimein long namba 5 be hemi luk denja tumas naoia afta we hemi bin winim Scotland.

Long wol ranking naoia, New Zealand i topem, Ireland seken, Wales namba 3, England 4, Australia 5, Scotland 6, South Africa 7, France 8, Argentina 9 mo Fiji long namba 10 posisen.