Praem Minista Charlot Salwai Tabimasmas wetem sam Steit Minista i mitim ol jif blong Maewo tedei long Luganville, Santo.

Stampa tinktink blong miting ia, hemi blong Gavman i toktok wetem ol stret lan-ona blong graon long Maewo blong gavman i save tekem folem loa, i kam namba 2 hom blong ol pipol blong Ambae.

VBTC nius i kasem infomeson se samples long 10 jif mo ol stret lan-ona oli stap long Luganville blong toktok wetem Gavman blong Vanuatu.

Hed blong Gavman, Praem Minista Charlot Salwai Tabimasmas i kasem Luganville tedei moning blong openem niufala ofis blong Pablik Sevis Komison long Luganville, mo blong mitim ol jif blong Maewo.

Aot-kam blong miting bitwin Gavman mo ol jif blong Maewo bae i stap long best intres blong Gavman, stret lan-ona mo pipol blong Ambae.

Long saed blong ol jif blong Santo, Presiden blong Tabwemasana kaonsel blong ol jif. jif Levus Tamata, i konfemem se 2,000 hekta blong graon i redi finis, blong akomodetem ol pipol blong Ambae we oli muv i ko long Santo mo i kat lukluk se notis blong karem graon ia i save kasem nasenal gavman.