Exekutiv komiti blong Port Vila Football Association i mit long 28 Okis mo tekem faenol desisen long wan komplen leta blong Siaraga FC akensem two nara klab.

VBTC spots i kasem ripot long ofis blong PVFA se komiti blong lik i dismisim komplen blong Siaraga akensem Yatel mo Shepherds United.

Long komplen leta blong Sia FC akensem Yatel i talem se klab konsen i yusum sam ineligible pleia long tufala primia rilegesen match long manis May yia ia.

PVFA i kamaot wetem findings blong hem se ol pleia ia oli rejista long hem mo oli gat raet blong plei long Yatel.

Siaraga i komplen tu long Shepherds United se hemi yusum seves blong Claude Aru be PVFA i kamaot blong mekem i klia se pleia ia hemi rejista long United mo hemi gat raet blong plei long lik kompetisen.

Komplen i kasem lik ofis afta we tufala klab Yatel mo Shepherds United i winim Siaraga FC long lik match.