Hed blong kavman blong Vanuatu, Prime Minista, Charlot Salwai Tabimasmas i askem Asian Development Bank (ADB) blong lukluk bagegan long ol project blong hem we i stap mekem long kantri.

Pablik Relation Ofisa blong Prime Minista ofis, Hilarie Bule i talem se Mr Salwai i mekem toktok ia folem nomo sam wok we ADB i stap mekem be i no mitim expectation blong kavman mo ol pipol long Vanuatu.

Hemi askem blong ADB blong hemi includium long nekis taem long ol project blong olgeta, ol lokol engineer blong Vanuatu blong oli pat tu long wok blong wan project.

Hemi pointem aot tu se ol lokol engineer oli save gud ol islands blong Vanuatu, mo save wok folem situation blong graon mo solwora blong olgeta.

Long nara storian, hemi luk save tu ol bik development especially long Infrastructure we ADB i stap mekem blong helpem Vanuatu.