Vanuatu mo Erakor Golden Star difenda, Bryan Kaltack i luk fowod blong joinem Auckland City FC long niufala futbol sisen we bambae i stat i no longtaem.

Bryan Kaltack i mekem toktok ia wetem VBTC Sports long Satede las wiken afta we hemi kam spendem wan wik spell wetem ol famli long home.

Hemi talem se taem wan wik holidei blong hem i finis bambae hemi nomo go bak joinem Wairarapa United from hemi ofisoli tranfer finis i go long Auckland City futbol klab.

Hemi talem se hemi wan drim kam tru blong hem blong plei long wan mo longtaem jampion klab long futbol long rijen wwe hemi Auckland City.

Bryan Kaltack i pointemaot se hemi no isi from bambae hemi mas wok insaed mo aotsaed long fil blong sekiurem posisen blong hem tim taem oli stap kompit long New Zealand nasonal jampionsip.

Nomata long hemia be hemi sua se manejmen blong Auckland City i luk save kwaliti blong hem i mekem se hemi haerem seves blong hem mo hemi karem ples blong wan difenda we i go saen long nara klab.