Wok iko hed blong bildim ol toilet mo ol wota system blong ol pipol blong Ambae we oli stap liv long Maewo, wetem ol komuniti we oli lukoutem olketa.

Adventist Developmen Relief Agency o ADRA mo Dipatmen blong Wota Risos i stap lidim wok ia, we mane blong hem i kam long kavman blong New Zealand.

Bae oli bildim ova long 50 toilet wetem installation blong wota system long 8 host komuniti.

Mo i kat ol wota tank blong 6-tausen lita we bae oli instolem, wetem ova long 170 tap blong wota.

Kavman blong New Zealand i kivim ova long 149 million vatu long ol WASH projekt sins volkeno blong Ambae i stat long muvmuv long las yia.