Gavman blong Vanuatu i alaoem blong Vanuatu i tekem pat long Pasifik Meresin testing prokram blong Australia long Vanuatu, folem wan saening blong Memorandum blong Andastanding MoU we Praem Minista i saenem yestedei long Nauru wetem Gavman blong Australia.

Anda long MoU ia, bae i kat 5 difren meresin we bae oli testem long wan yia, mo 3 long ol meresin ia oli yusum oltaem we hemi anti-baeotik mo ol meresin blong tritim non-komunikebol disis.

Narafala 2 meresin ia hemi ol niufala test blong faenem weta i save wok gud.

Kiribati, Nauru. Solomon aelans, Tonga mo Tuvalu hemi ol kantri we i statem finis blong tekem pat long testing prokram ia.

Pasifik Medesin Testing Prokram i bin stat long manis August las yia 2017 mo hemi pat blong komitmen blong Australia long resilien, sef, sekiua mo prosperios pasifik.

Ripot i talem se medesin testing prokram ia, hemi wan long ol 5 praoriti blong forein polisi blong Australia we oli bin setem aot long 2017 forein polisi waet pepa.